मोटरसाइकल दुर्घटनामा दुईको मृत्यु, मृतकको पहिचान खुल्न सकेन

कोशी राजमार्गको मोरङ बूढीगङ्गा गाउँपालिका ४ मा आज भएको मोटरसाइकल दुर्घटनामा दुई जनाको ज्यान गएको छ । मोटरसाइकल चालक र पछाडि बसेका अर्का एक जनाको ज्यान गएको बताइएको छ । यद्यपि उनीहरुको परिचय खुलेको छैन ।

जिल्ला प्रहरी कार्यालय मोरङका अनुसार बिहान ९ बजेको समयमा बा. ६३ प ४२७ नम्बरको मोटरसाइकल बिजुलीको पोलमा ठोक्किएपछि दुर्घटनामा परेको हो । दुर्घटनामा गम्भीर घाइते दुबै जनाको बिराट टिचिङ अस्पतालमा उपचारको क्रममा मृत्यु भएको हो । मृतकको शव कोशी अस्पतालको शव गृहमा राखिएको छ । सम्बन्धित आफन्तजनले जिल्ला प्रहरी कार्यालय मोरङको ९८५२०३८३५५ मा सम्पर्क राख्न अनुरोध गरिएको छ ।

प्रहरीले मृतकहरुमध्ये एक जना अन्दाजी ३० देखि ३५ र ५ फिट ४ इञ्च अग्लो रहेको जानकारी दिएको छ । ती पुरुषले नीलो र पहेलो रंगको ट्याकसुट लगाएका छन् । अर्का पनि २९ वर्षका देखिने पुरुषको उचाइ अन्दाजी ५ फिट ४ इञ्च छ । उनले कालो जम्पर लगाएका छन् ।