राष्ट्रपतिले नागरिकता विधेयक प्रमाणीकरण गरेकोमा अमेरिकामा बस्ने काँग्रेसीहरु हर्षित

गैरआवासीय नेपाली (एनअरएनए) हरूले नागरिकता पाउने बाटो खुलेसँगै नेपाली काँग्रेसको भातृ संस्था नेपाली जनसम्पर्क समिति अमेरिकाले खुशी प्रकट गरेको छ ।

पूर्वराष्ट्रपति विद्यादेवी भण्डारीले रोकेको नागरिकता ऐनको संशोधन विधेयक राष्ट्रपति रामचन्द्र पौडेलले प्रमाणीकरण गरेसँगै एनअरएनएहरुलाई नेपाली नागरिकता पाउने बाटो खुलेको छ । अब नेपाली नागरिकता त्यागेर विदेशमा बसेका व्यक्तिले आर्थिक, सामाजिक र सांस्कृतिक अधिकार पाउनेछन् । 

गैरआवासीय नागरिकता दक्षिण एसियाबाहेक अरू देशमा बसोबास गर्नेले मात्र पाउने छन् । पाँच वटा प्रमाणसहित निवेदन दिएपछि उनीहरुलाई नागरिकता प्राप्त हुने छ ।

नेपाली जनसम्पर्क समिति अमेरिकाका सभापति आनन्द विष्ट विज्ञप्ति जारी गर्दै प्रवासी नेपालीले उठाउँदै आएको गैरआवासीय नागरिकताको अधिकारको सुनिश्चितता भएकाले विधेयक प्रमाणीकरण हुनु सुखद पक्ष रहेको बताए । साथै विदेशमा बस्ने नेपालीको हक, अधिकार तथा सदैव नेपाली हुने कानुनी आधारका लागि समेत बाटो खुलेको उनले बताएका छन् । 

नेपालको संविधान २०७२ ले प्रत्याभूत गरेको आर्थिक, सामाजिक र सांस्कृतिक अधिकारसहितको गैरआवासीय नेपाली नागरिकता प्राप्त गर्ने प्रक्रियाको लागि ऐतिहासिक उपलब्धिको दिन भएको विष्टले उल्लेख गरेका छन् ।

'भूगोलमा जहाँ रहे पनि सबैभन्दा पहिले हामी नेपाली हौं । हाम्रो हक, अधिकारको सुनिश्चितता गर्ने पहिलो जिम्मेवारी नेपाल सरकारको हो । यसका लागि विश्वभर छरिएर रहेका आम नेपाली जनसम्पर्क समितिका सदस्य र गैरआवासीय नेपाली संघले निरन्तर आवाज उठाउँदै आएको जगजाहेर नै छ । हाम्रो निरन्तरको सामूहिक अनुरोध र संगठित आवाजलाई आज हाम्रो मातृभूमिको सरकारले सुनेको छ । यसका लागि हामी हाम्रो मातृ पार्टी नेपाली कांग्रेसको नेतृत्व र संसदमा रहेका माननीयज्यू सबैलाई एकमुष्ट धन्यवाद दिन चाहन्छौं,' विष्टले जारी गरेको विज्ञप्तिमा भनिएको छ ।