चिनियाँ धनाढ्य ज्याक मा चितवनको मैघौली जाँदै

हिजो काठमाडौं आइपुगेका चिनियाँ कम्पनी अलिबाबा ग्रुपका संस्थापक तथा कार्यकारी अध्यक्ष ज्याक मा आज चितवन जाने कार्यक्रम छ । निजी चार्टर विमानमा आएका उनी हिजो दिउँसो त्रिभुवन अन्तर्राष्ट्रिय विमानस्थलमा ओर्लिएका थिए । 

चिनियाँ इ–कमर्स कम्पनी अलिबाबाका संस्थापक ज्याक विश्वका सर्वाधिक धनाढ्यहरु मध्येका एक हुन् । चार्टर विमानमा उनी ढाका हुँदै आएका थिए । पर्सि सबेरै पाकिस्तानको लाहोर जाने उडान तालिका छ । 

राजधानीको बत्तिसपुतलीस्थित होटल द्वारिकाजमा बसेका उनी आज चितवनको मैघौली जाँदैछन् । त्यहाँको मेघौली सेरईमा उनले विनोद चौधरीसँग भेट गर्ने कार्यक्रम तय भएको बताइएको छ । उक्त रिसोर्ट चौधरीको हो ।

उनले आजै प्रधानमन्त्री प्रधानमन्त्री पुष्पकमल दाहाल प्रचण्ड र अर्थमन्त्री डा. प्रकाशशरण महतसँग भेट्ने कार्यक्रम छ । 

माको चार्टर विमानमा सात जना काठमाडौं आएका छन् । तीमध्ये छ जना चालक दलका सदस्य भएको बताइन्छ । टोली हङकङमा दर्ता रहेको जेट एभिएसन बिजनेस जेट्स हङकङ लिमिटेडको ८७३७ म्याक्स ८ विमानमा आएको हो । कल साइन भीपी सीएमए रहेको उक्त विमान केवल यात्रु चार्टरमा मात्र प्रयोग हुने गरेको छ । हिजोको उडान क्याप्टेन र्याण्डी डुरान हले भरेका थिए ।

विमानको कुल तौल ८२ हजार १९० किलोग्राम भएको बताइएको छ । जहाजलाई त्रिभुवन अन्तर्राष्ट्रिय विमानस्थलको बे ९ को ठ्याक्कै विपरित दिशामा पार्किङ गराइएको छ ।

सामान्य पर्यटक सरह नेपाल आएका माले हिजै साँझ नेपालका लागि चिनियाँ राजदूत छन् सोङसँग शिष्टाचार भेटवार्ता गरेको स्रोतको दाबी छ ।