पेट्रोल पम्पमा आगो लाग्दा २७ जनाको ज्यान गयो, पाँच दर्जन सिकिस्त

रुसको एक पेट्रोल पम्पमा आगलागी हुँदा २७ जनाको मृत्यु भएको छ भने ६० जनाभन्दा बढी घाइते भएका छन् । दक्षिणी क्षेत्र दागेस्तानमा रहेको एउटा पेट्रोल पम्पमा भएको आगलागीमा तीन बालबालिकासहित २७ जनाको ज्यान गएको हो । 

हिजो राति मखचकलाको राजमार्गमा रहेको सवारीसाधन मर्मत पसलबाट शुरु भएको आगलागी नजिकैको पेट्रोल पम्पमा फैलिएर विस्फोट हुँदा धनजनको ठूलो क्षेती भएको उद्धारकर्मीहरुले बताएका छन् । ६ लाखभन्दा बढी मानिसहरूको सहर मखाचकला दागेस्तानको राजधानी हो । आगलागीको भिडियो फुटेजमा एक तले भवनमा आगलागी भएको देखाइएको छ ।  

रुसको आपतकालीन मन्त्रालयले आज बिहान आगो निभाइएको जनाएको छ । घाइतेसमध्ये १३ जना बालबालिका छन् । १० जनाको अवस्था गम्भीर रहेकोे रुसी उपस्वास्थ्यमन्त्री भ्लादिमिर फिसेन्कोले बताएका छन् । गम्भीर घाइतेहरुलाई उद्धार गर्न मखचकलामा विमान पठाइएको थियो ।

रुसी आपतकालीन सेवाले जारी गरेको विज्ञप्तिमा ६०० वर्ग मिटर क्षेत्रफलमा फैलिएको आगो निभाउन अग्नि नियन्त्रकहरूलाई साढे तीन घण्टाभन्दा बढी समय लागेको थियो ।