शीतल निवासमा सार्क महासचिव, बालुवाटारमा बेलायती राजदूत

राष्ट्रपति रामचन्द्र पौडेलसँग दक्षिण एसियाली राष्ट्रहरुको क्षेत्रीय सहयोग संगठन (सार्क) का महासचिव मोहम्मद गोला सरवारले भेट गर्नुभएको छ । राष्ट्रपति पौडेलसँग भेट गर्न महासचिव सरवार दिउँसो पौने २ बजे शीतल निवास पुग्नुभएको थियो । 

आजै नेपालका लागि बेलायती राजदूत रोब फेनले प्रधानमन्त्री पुष्पकमल दाहाल ‘प्रचण्ड’सँग शिष्टाचार भेटवार्ता गर्नुभएको छ । प्रधानमन्त्रीको सरकारी निवास बालुवाटारमा भएको भेटमा उहाँहरुबीच द्विपक्षीय आपसी हितका विषयमा विचार विमर्श भएको जनाइएको छ ।

राजदूत फेनले कार्यभार सम्हाल्न नेपाल आएपछि प्रधानमन्त्री प्रचण्डसँग गरेको यो नै पहिलो भेटवार्ता हो । प्रधानमन्त्रीसँग सार्कका निवर्तमान महासचिव इसला रुवान विराकुनले पनि आजै बिदाइ भेट गरेको प्रधानमन्त्रीको निजी सचिवालयले जानकारी दिएको छ ।