सेनाले निशुल्क नाडी छाम्न थाल्यो

नेपाली सेनाले रुकुम पश्चिममा निःशुल्क स्वास्थ्य शिविर सन्चालन गरेको छ।

चण्डीदल गण सल्लेले स्वास्थ्य सेवा कार्यालय, चौरजहारी अस्पताल, आँखा उपचार केन्द्र र साझा मुराल अस्पतालसँगको सहकार्यमा आज शनिबार सल्लेमा निःशुल्क स्वास्थ्य शिविर सन्चालन गरेको हो।

मुसिकोट नगरपालिकाका मेयर महेन्द्र केसी र प्रमुख जिल्ला अधिकारी हरिप्रसाद पन्तले संयुक्त रुपमा स्वास्थ्य शिविरको शुभारम्भ गर्नुभएको हो ।

भूतपूर्व तथा बहालवाला सैनिक र आश्रित परिवारलाई लक्षित गरी स्वास्थ्य शिविर आयोजना गरिएको प्रमुख सेनानी बरुण केसी खत्रीले जानकारी दिनुभयो । उहाँका अनुसार शिविरबाट १२५ जनाले सेवा सेवा लिएका छन् भने २२ जनालाई निशुल्क चस्मा र अन्यलाई निशुल्क औषधि बितरण गरिएको छ ।

शिविरमा नाक,कान, घाँटी,हाडजोर्नी,पेट, छाला,महिला तथा स्त्री रोगसम्बन्धी उपचार सेवा विशेषज्ञ डाक्टरबाट प्रदान गरिएको प्रमुख सेनानी खत्रीले बताउनुभयो । उहाँका अनुसार शिविरमा जिल्ला अस्पताल, चौरजहारी अस्पताल, साझा मुराल अस्पताल र नेपाली सेनाको १९ नम्बर बाहिनी दाङमा कार्यरत विशेषज्ञसहितको टिमले सेवा दिएको थियो ।

शिविरबाट नेपाल प्रहरी र सशस्त्र प्रहरीले पनि सेवा लिएका छन् ।  शिविरमा स्वास्थ्य परीक्षण गर्दा अधिकाँशमा हाडजोर्नी र आँखाको समस्या देखिएको बताइएको छ ।

यस्तै सेनाले सञ्चालन गरेको निःशुल्क शिविरबाट आश्रित परिवारले समेत सेवा लिन पाएको भूतपूर्व सैनिक संघ रुकुम पश्चिमका अध्यक्ष तेजबहादुर चन्दले जानकारी दिनुभयो । लामो समयसम्म देशको सेवा गरेर सेनाको तर्फबाट यस्ता सेवामूलक काम हुँदा आफूलाई गौरव लागेको उहाँको भनाइ छ।