भरतपुर अस्पतालमा ११ हजार बढी सुत्केरी, टीकाको दिन २० शिशुको जन्म

प्रसुती सेवाका लागि ख्याति कमाएको चितवनको भरतपुर अस्पतालमा सुत्केरी हुने आमाहरुको संख्या बढेको छ । 

आर्थिक वर्ष २०७९–८० मा अस्पतालमा ११ हजार ८९४ जना सुत्केरी भएका छन् । त्यस्तै, दशैंको टीकाको दिन मात्रै २० शिशुको जन्म भएको छ । सबैतिर टीका लगाइरहँदा भरतपुर अस्पतालमा भने सुत्केरी हुने महिलाको चाप थियो । 

अस्पतालले बिदामा पनि स्वास्थ्यकर्मी खटाएर प्रसुती सेवा दिएको हो । दशैं बिदा भएकाले अन्य दिनको विवरण निकाल्न नसकिएको अस्पतालका तथ्याङ्क ईकाइ प्रमुख नारायण रिजालले बताए । अस्पताल आएर प्रसुती सेवा लिनेको संख्या प्रत्येक वर्ष बढ्दै गएको उनको भनाइ छ । 

भरतपुर अस्पताल मुलुकको नामी अस्पतालमा पर्दछ । चितवन र वरपरका आठ जिल्लाका लाखौंं सेवाग्राहीलाई अस्पतालले प्रत्यक्ष सेवा पुर्याउँदै आएको छ । काठमाडौंको प्रसुती गृहपछि दोस्रो ठूलो प्रसुती अस्पताल रहेको भरतपुर अस्पतालमा २४ सैं घण्टा अप्रेसन सुविधाको व्यवस्था गरिएको छ । 

त्यस्तै, अस्पतालमा वरिष्ठ फिजिसियनहरु कार्यरत छन् । दैनिक ४० देखि ४५ जना महिलाले अस्पतालबाट प्रसुती सेवा लिँदै आएका छन् । गर्भवतीले परीक्षण निजी अस्पतालमा गराउने भएपनि बच्चा जन्माउन भने भरतपुर अस्पताल नै आउने गरेका छन् । 

जनचेतनामा अभिवृद्धि र सरकारी सहयोगका कारण पछिल्लो समय स्वास्थ्य संस्थामा गएर प्रसुती गराउने महिलाको संख्या बढ्दै गएको छ । स्वास्थ्य संस्थामा गएर प्रसुती गराउनु सुरक्षित हुनुको साथै शिशु मृत्युदरमा समेत कमी आएको छ ।