छानबिन टोली ६१ किलो सुन तस्करीको प्रक्रिया बुझ्दै विमानस्थलमा
त्रिभुवन अन्तर्राष्ट्रिय विमानस्थलको भन्सारबाट गत साउनमा अवैध तवरले बाहिरिएको एक क्विन्टल भनिएको सुनको छानबिन गरिरहेको टोली आज विमानस्थल पुगेको छ । बिहान ११ बजे पुगेको उक्त टोलीका सदस्यहरु विभिन्न भागको निरीक्षण र सोधपुछ गरेपछि दिउँसो पौने ३ बजेको समयमा त्यहाँबाट बाहिरिएको बताइन्छ ।
स्कुटरको ब्रेक सुभित्र हालेर ल्याइएको सुन गालेपछि ६१ किलोग्राम कायम भएको हो । हङकङबाट कार्गो गरेर ल्याइएको सुन विमानस्थल भन्सारबाट एकाएक तस्करी भएपछि संसद बैठकसमेत झण्डै एक महिना अवरुद्ध भएको थियो ।
सरकारले सुन तस्करी छानबिनका लागि गठन गरेको उच्चस्तरीय जाँचबुझ आयोगका अध्यक्ष डिल्लीराज आचार्यलगायत चार सदस्यीय टोलीले आज भन्सारको आयात तथा निर्यात कक्षलगायतको निरीक्षण गरेको बुझिएको छ ।
उनीहरुले त्यहाँको एक्सरे मेसिनसँगै तस्करीमा प्रयोग भएको मार्ग र प्रक्रियाबारे कर्मचारीसँग सोधनी गरेको बताइन्छ । विमानस्थल भन्सार प्रमुख सहसचिव टेकराज पाण्डेले सोधनीको जवाफ दिएका थिए ।
टिप्पणीहरू