प्रतिगामीहरूले कहिल्यै पूरा नहुने सपना देखेको प्रधानमन्त्रीको दाबी

प्रधानमन्त्री पुष्पकमल दाहाल प्रचण्डले संघीय लोकतान्त्रिक गणतन्त्र उल्टाउन चाहने प्रतिगामीहरूको सपना कहिल्यै पूरा नहुने दावी गर्नुभएको छ ।

सरकारी लिखतहरूमा नेपाल संवत उल्लेख गर्ने सरकारको निर्णयको स्वागतमा आफूलाई सम्मान गर्ने कार्यक्रममा उहाँले उक्त धारणा व्यक्त गर्नुभएको हो । ‘आजको परिवर्तन साना दुःखले आएको होइन । यो व्यवस्थाका निम्ति हजारौंले रगत बगाएका छन्, हजारौंले जेलनेल भोगेका छन् । लाखौं जनताले संघर्ष गरेका छन् । यो व्यवस्था कसैले उल्टाउन खोज्छ भने त्यो सपना मात्रै हो, कहिल्यै पूरा हुँदैन’, प्रधानमन्त्रीले दाबी गर्दै भन्नुभयो ।

पराजित भइसकेका सामन्ती तत्वहरूले टाउको उठाउन खोज्नु संसारकै नियम हो भन्दै उहाँले अहिले त्यही कोसिस चलिरहेको उल्लेख गर्नुभयो । ‘संघीय लोकतान्त्रिक गणतन्त्र उल्टाउने सपना कसैले नदेख्दा हुन्छ’, प्रधानमन्त्री प्रचण्डले अगाडि भन्नुभयो, ‘यस्तो दुस्प्रयास गर्नेहरूले फेरि अर्को मूल्य चुकाउनुपर्नेछ ।’

प्रधानमन्त्रीले नेपाल संवत् नेपालको मौलिक संवत् भएको पनि बताउनुभयो । भन्नुभयो, ‘हामीले विक्रम संवत् प्रयोग गरिरहेका छौं । कतिपय सन्दर्भमा अंग्रेजी संवत् पनि लेखिन्छ । तर, नेपाल संवत् नेपालको आफ्नै मौलिक संवत् हो । यसलाई राष्ट्रिय संवतको रूपमा विकसित तुल्याउनुपर्दछ ।’