बनेपामा सवारी दुर्घटना, घाइतेलाई काठमाडौं रिफर

गएराति बनेपामा भएको सवारी साधन दुर्घटनामा दुई जना घाइते भएका छन् । काठमाडौंबाट पनौतीतर्फ जाँदै गरेको ट्रिपरले चारदोबाटो चोकमा विपरीत दिशाबाट आउँदै गरेको मोटरसाइकललाई ठक्कर दिँदा मोरटसाइकलमा सबार दुबै जना घाइते भएका हुन् ।

बा.४ ख ७३५९ नम्बरको ट्रिपरले बा.प्र.०२–०१९ प ३१६८ नम्बरको मोटरसाइकललाई राति पौने १२ बजे ठक्कर दिएको हो । घाइते मोटरसाइकल चालक २६ वर्षका तीर्थमान लामा र पछाडि बसेका ३५ वर्षे आस्मान लामालाई राति शीर मेमोरियल अस्पतालले केएमसी सिनामंगल रिफर गरेको बताइन्छ । 

घाइतेहरुको टाउको, मुख र गोडामा चोट लागेको प्रहरीको भनाई छ । ट्रिपर चालक ३७ वर्षे देवनारायण खड्गीसहित दुबै सवारी साधनलाई प्रहरीको नियन्त्रणमा राखिएको छ ।