विद्यालय तोडफोड,ल्यापटप चोरी, चार बालकको मनपरि

विद्यालय तोडफोड गरी ल्यापटप चोरेको आरोपमा प्रहरीले चार जनालाई नियन्त्रणमा लिएको छ । कास्कीको पोखरा महानगरपालिका ३३,बरपाण्डेथुमस्थित श्री शान्ति उदय उच्च माध्यमिक विद्यालयको कार्यालय,कक्षाकोठा र कम्प्युटर ल्याबको ढोका फुटाएर ल्यापटप चोरी गरेको आरोपमा प्रहरीले ती बालकलाई समातेको हो । 

पक्राउ पर्ने एक जना १६, दुई जना १७ र एक जना १८ वर्षका रहेका छन् । गत वैशाख २८ गते राति उक्त विद्यालयबाट ११ थान ल्यापटप, सात थान चार्जर र पाँच थान माउसलगायतका विद्युतीय सामान चोरी भएको थियो । चोरी भएपछि विद्यालयले ईलाका प्रहरी कार्यालय, सिसुवामा उजुरी दिएको थियो । 

कार्यालयबाट खटिएको टोलीले उनीहरुलाई १० थान ल्यापटपसहित समातेको जिल्ला प्रहरी कार्यालय, कास्कीका सूचना अधिकारी प्रहरी नायव उपरीक्षक (डिएसपी) वसन्तकुमार शर्माले बताए । शर्माका अनुसार कास्की जिल्ला अदालतबाट पाँच दिनको म्याद थप गरी उनीहरुमाथि अनुसन्धान थालिएको छ ।