पतञ्जलीको जग्गासम्बन्धी कागजात बुझाउन लेखा समितिको एक हप्ते म्याद

सार्वजनिक लेखा समितिले काभ्रेपलाञ्चोकमा रहेको भारतीय योगगुरु रामदेवको पतञ्जली योगपीठको जग्गासम्बन्धी सम्पूर्ण कागजात सात दिनभित्र बुझाउन सरकारलाई निर्देशन दिएको छ । 

समितिले आज भूमि व्यवस्था, सहकारी तथा गरिबी निवारण मन्त्रालयलाई पत्र लेख्दै पतञ्जली योगपीठको जग्गा खरिद र बिक्रीको प्रयोजन खुलाउन आग्रह गरेको हो ।

‘पतञ्जली योगपीठले हदबन्दी छुट पाएको ३५३ रोपनी अपचलन भन्ने विषयमा के कसो भएको हो ? पतञ्जली योगपीठको कुल जग्गा कति हो ?’, समितिको पत्रमा भनिएको छ, ‘उक्त जग्गाको हालको अवस्था साथै सम्पूर्ण विवरण तथा कागजातहरु सात दिनभित्र समिति सचिवालयलाई उपलब्ध गराइदिनुहुन अनुरोध छ ।’