श्रीलंका जान लागेका इरानीहरुको लगेजमा विदेशी मुद्राको बिटो

काठमाडौंबाट श्रीलंकाको कोलम्बो जान लागेका दुई जना इरानी नागरिकको साथबाट डलरलगायत विदेशी मुद्रा फेला परेको छ । ३० दिनको टुरिष्ट भिसामा जेठ २० गते कोलम्बोबाट काठमाडौं आएका उनीहरु आज श्रीलंकन एअरलाइन्सको उडान नम्बर युएल १८२ मा फर्कन लाग्दा त्रिभुवन अन्तर्राष्ट्रिय विमानस्थलमा पक्राउ परेका हुन् ।

पासपोर्ट नम्बर एम६५९५६९३८ का याज्दान्यार माजिदियाही र एच ६६०३९६७७ का पेगाहअ ताहेरीको साथबाट १२ हजार पाँच सय अमेरिकी डलर एक हजार सात सय ५० अवैध युरो फेला परेको बताइएको छ ।

प्रहरीका अनुसार बेलायती पौण्ड चार हजार दुई सय, दिराम १६ हजार पाँच सय, श्रीलंकन मुद्रा रुफिया आठ लाख ४० हजार र भारतीय रुपिया आठ हजार आठ सय उनीहरुको ब्यागेजमा भेटिएको हो ।

बरामद मुद्रासहित उनीहरुलाई महानगरीय प्रहरी वृत्त गौशालाको हिरासतमा राखिएको छ । भोलि विदेशी विनिमयको अवैध कारोबार सम्बन्धी कसुरमा राजश्व अनुसन्धान विभाग हरिहरभवन ललितपुरमा बुझाइने प्रहरीको तयारी छ ।