पहिले रवि, त्यसपछि क्रमशः अरुलाई पक्रने प्रहरीको तयारी

जिल्ला अदालत कास्कीले आज जारी गरेको पक्राउ पुर्जीमा रास्वपा सभापति तथा पूर्व उपप्रधान एवम् गृहमन्त्री रवि लामिछानेसहित अरु एक दर्जनको नाम उल्लेख छ । रविलाई पक्राउ गर्न प्रहरीको सिआईबी टोली रास्वपा कार्यालय, बनस्थली पुगेको छ ।

सहकारी ठगीमा अनुसन्धानका लागि आज अदालतले जारी गरेको पक्राउ पुर्जीमा लामिछानेसहित विशाल तामाङ, नवीन अछामी, रविना रिमाल, असरफ अली सिद्दिकी र दीपक लामाको नाम उल्लेख छ । 

त्यसैगरी अनन्त बाबु राई, रामबहादुर खनाल, देवेन्द्रबाबु राई, विज्ञान राई, ओमप्रकाश गुरुङ, वीरबहादुर रानाभाट, दिपा न्यौपाने र कल्पनाकुमारी श्रेष्ठ विरुद्ध पनि एउटै पक्राउ पुर्जी जारी भएको प्रहरीले बतायो ।

पोखरास्थित सूर्यदर्शन सहकारी ठगी आरोपमा अनुसन्धान गर्न न्यायाधीश कृष्णजंग शाहको इजलासले आज अपरान्ह प्रहरीलाई पक्राउ अनुमति दिएको हो । प्रहरीको मागअनुसार उनीहरुसँग बयानलगायत थप अनुसन्धान गर्नुपर्ने आधार, कारण मनासिब देखिएकोले मुलुकी फौजदारी कार्यविधि संहिता, २०७४ को दफा ९ (३) बमोजिम पक्राउ गर्न अनुमति दिइएको उल्लेख छ । 

उनीहरुमाथि ठगी तथा संगठित अपराध सम्बन्धी मुद्दामा अनुसन्धान हुने बताइएको छ ।