साँखुदेखि स्वयम्भूसम्म बिजुली अवरुद्ध हुँदै

काठमाडौंका विभिन्न स्थानमा पर्सिदेखि केही दिन विद्युत अवरुद्ध हुने भएको छ ।

कुलेश्वर र जोरपाटी वितरण केन्द्रअन्तर्गत लाइन भूमिगत गर्नका लागि विद्युत बन्द गर्न लागिएको छ । नेपाल विद्युत प्राधिकरण आयोजना व्यवस्थापन निर्देशनालयले आज सूचना जारी गर्दै साँखु बजारदेखि स्वयम्भू चोकसम्म क्षेत्रमा विद्युत आपूर्ति प्रभावित हुने जानकारी दिएको छ । 

शनिबार साँखु बजार, सोमबार र बुधबार स्वयम्भू क्षेत्र, बिहीबार स्युचाटार सबस्टेशन क्षेत्र, शुक्रबार फिकल चोक र मंसिर १५ गते स्वयम्भू क्षेत्रमा विद्युत आपूर्ति बन्द हुने छ । निर्देशनालयका अनुसार बिहान ११ बजेदेखि दिउँसो ३ बजेसम्म विद्युत आपूर्ति बन्द रहने छ । 

प्राधिकरणले भनेको छ, ‘नेपाल विद्युत प्राधिकरण, कुलेश्वर वितरण केन्द्र र जोरपाटी वितरण केन्द्रअन्तर्गत विद्युतीय वितरण लाइन भूमिगत गर्ने कार्यका लागि तपसिलबमोजिम मितिहरुमा उल्लिखित फिडरहरुअन्तर्गत विभिन्न स्थानहरुमा बिहान ११ बजेदेखि दिउँसो ३ बजेसम्म विद्युत आपूर्ति बन्द हुने जानकारी गराइन्छ ।’