पहिले उत्कृष्ट ठहरिएका इन्सपेक्टरमाथि निकृष्ट ढंगले शारिरीक सम्पर्क गरेको आरोप

समाजमा हुनसक्ने अपराध र अराजकता नियन्त्रण गर्नु प्रहरीको कर्तव्य हो । तर उनै प्रहरीहरु नै काण्ड मच्चाउँदै हिँडे भने अवस्था के होला ? एक जना प्रहरी निरीक्षक (इन्सपेक्टर) र महिला जवानको लिभिङ टुगेदर काण्डले यतिबेला नेपाल प्रहरीभित्र खैलाबैला मच्चिएको छ । 

प्रहरीको केन्द्रीय विधिविज्ञान प्रयोगशालामा कार्यरत इन्सपेक्टर सञ्जय बुचामाथि एक महिला प्रहरी जवानले यौनशोषणको आरोप लगाएकी छन् । इन्सपेक्टर बुचाले सुरुमा बिहेको प्रलोभन देखाउँदै शारिरीक सम्बन्ध राख्न बाध्य पारेको उनको भनाई छ । तर अहिले अन्तरजातीय बिहे गर्न नसक्ने भन्दै पन्छिन खोजेको पीडित भनिएकी महिला जवानको आरोप छ ।  

बुचाले ती महिलालाई दोलखा, रामेछाप र रसुवाको जिल्ला प्रहरी कार्यालयमा आफ्नो श्रीमती भनेर चिनाएको बताइन्छ । यौन सन्तुष्टी पूरा भएपछि अहिले बुचाले आफूलाई  श्रीमतीको हैसियत दिन नखोजेको र अनेक बहानामा भागिरहेको महिलाको आरोप छ ।  

‘तल्लो दर्जाको कर्मचारीलाई प्रलोभनमा पारेर यौनशोषण गरेको’ भन्दै ती महिलाले बुचाविरुद्ध प्रहरी हेडक्वार्टरमा समेत उजुरी दिएकी थिइन् । विधि विज्ञान प्रयोगशालाका सूचना अधिकारी एसपी योगबहादुर पालले महिलाको उजुरीबारे पुष्टी गरेका छन् । उनका अनुसार महिलाले गत जेठ २७ गते शारीरिक सम्बन्ध राख्न बाध्य पारेको, त्यसपछि लगातार सम्बन्ध राख्न नपाएसम्म गाली गर्ने, झगडा गर्ने, मानसिक तनाव दिने, यौन सन्तुष्टिका लागि विभिन्न प्रकारका औषधि प्रयोग गरी यातना दिनेलगायतका आरोप लगाउदै उजुरी दर्ता गराएकी थिइन् । 
एसपी पालले जनआस्थासँग भने, ‘यसबारे हेडक्वार्टरमा उजुरी दर्ता भइसकेको रहेछ । उहाँ (बुचा)ले हामीसँग लिभिङ टुगेदरमा बसेको सत्य हो भनेर स्वीकार गर्नुभएको छ । तर महिलाले भनेजस्तो शोषण गरेको, यातना दिएको कुरो अस्वीकार गर्नुभएको छ ।’

महिलाले अर्कै प्रेमी बनाएपछि आफू टाढिएको बुचाको स्पष्टीकरण छ । सुरक्षा संयन्त्रभित्रै अशोभनीय काण्ड मच्चिएको पाइयो अब कसरी समाधान हुन्छ ? भन्ने प्रश्नमा एसपी पाल भन्छन्, ‘हेडक्वार्टरको उजुरी शाखाले छानबिन गर्दैछ । सामान्य गल्ती ठहरिएमा दोषीलाई विभागीय कारबाही हुन्छ । छानबिनले कस्तो निष्कर्ष निकाल्छ, त्यसमा भर पर्छ ।’

आरोपित इन्सपेक्टर बुचा २०७९ मा कोशी प्रदेशको उत्कृष्ट प्रहरी कर्मचारीको पुरस्कारबाट सम्मानित भएका थिए । पेशागत अनुशासन र स्थानीय तहको चुनावमा नेतृत्वदायी भूमिका खेलेको भन्दै उनलाई सम्मान गरिएको थियो ।