चीन जानुभएका पूर्व प्रधानमन्त्रीको स्वदेश आगमन

चीन भ्रमणमा जानुभएका पूर्व प्रधानमन्त्री तथा नेकपा एकीकृत समाजवादीका सम्मानित नेता एवम् विदेश विभाग प्रमुख झलनाथ खनाल स्वदेश फर्कनुभएको छ । नेता खनाल चाइना साउदर्नको उडान नम्बर सीजेड ६०६७ मा बिहान ११ बजे ग्वाङ्झौबाट काठमाडौं आइपुग्नुभएको हो ।

उहाँले ग्वाङ्झौमा आयोजित अन्डरस्ट्यान्डिङ चाइना कन्फरेन्स–२०२४ को आठौँ श्रृंखलालाई सम्बोधन गर्नुभयो । चाइना इन्स्टिच्युट फर इनोभेसन एण्ड डेभलपमेन्ट स्ट्राटेजी,चाइनिज पिपुल्स इन्स्टिच्युट अफ फरेन अफेयर्स र ग्वाङ्झौ प्रान्तीय जनसरकारको संयुक्त आयोजित अन्डरस्ट्यान्डिङ चाइना कन्फरेन्सको दोस्रो प्लेनरी सेसनलाई प्रमुख वक्ताको रूपमा नेता खनालले सम्बोधन गर्नुभएको हो । ‘चीनको व्यापक सुधारलाई अझ गहिरो बनाउने विषयको अर्थ,सम्भावना र अवसरहरू’ रहेको सम्मेलनमा सात वटा विषयमा व्यापक छलफल गरिएको थियो ।

गत शनिबार चीन जानुभएका उहाँले त्यसअघि राजधानी बेइजिङमा चिनियाँ कम्युनिष्ट पार्टीका नेताहरुसँग भेटवार्ता गर्नुभएको थियो । एकीकृत समाजवादीको विदेश विभागका प्रमुख खनालसँगै सोही उडानमा विभागीय सचिव शंकरप्रसाद खतिवडा पनि काठमाडौं फर्केको बताइन्छ ।
You sent