रातो मान्छे

रातो क्याप

रातो ज्याकेट
उहिल्यै कसैलाई जडौरी दिइसकिएको छ

रेड बुक दराजमा थन्केको त जुगौँ भयो

एउटा रातो झन्डा त सधैँ  रहेकै हुन्थ्यो कतै भण्डारतिर
त्यो पनि कुनै भ्रातृ वा भगिनी सङ्गठनले चलाउँदै होला

अब त ठडिएको छ 
रातो बङ्गला अग्लो डाँडामा

अनुहारको रातोपिरो 
महँगै स्याउ वा 
रातो खुर्सानीले हुनुपर्छ 
अनि आँखा हरपल रहन्छ लाल लाल 
वेदर वा ठुलै इभेन्टले च्यालेन्ज गरिरहन्छन् त के गर्ने

रातो वस्त्रले सजिएका इम्पोरियम, मल वा सपिङ टावर 
जुलुस गए जस्ता लाग्छन् 
र रातो गलबन्दी गुतेका सबै कार्यकर्ता र समर्थक 

ए भूतपूर्व रातो मान्छे,
तयार छौँ हामी अझै
अर्काे नयाँ क्रान्तिको बलिवेदीमा होमिन
तिमीलाई सत्ताको आलिसन महलमा चढाएर
हामी पनि खाऔँला नि रक्तक्रान्तिको आजन्म भत्ता । 
–––
२०८१ मङ्सिर १९–२१