महोत्सवमा आगलागी,८० स्टल खरानी

सल्यानको श्रीनगरमा जारी महोत्सवमा आगलागी भएको छ ।    

राष्ट्रिय लोकदोहोरी प्रतिष्ठान सल्यानले माघ १८ गतेबाट आयोजना गरेको महोत्सवमा ८ औं दिन राती आगलागी भएको हो । 

महोत्सवमा राखिएका १३५ स्टलमध्ये ८० मा आगजानी भएको राष्ट्रिय लोकदोहोरी प्रतिष्ठान सल्यानका सचिव नोखिराम थापाले जानकारी दिए । उनका अनुसार गएराती ११ बजे स्टलमा आगलागी भएको हो । आगलागीबाट आठ करोड बढिको क्षति भएको अनुमान छ ।

 नेपाली सेना,नेपाल प्रहरी, सशस्त्र प्रहरी र स्थानीयद्वारा राती नै आगो नियन्त्रणमा लिएको जिल्ला प्रहरी कार्यालय सल्यानका प्रमुख केशर न्यौपानेले जानकारी दिए । उनले क्षतिको यकिन विवरण सङ्कलन भइरहेको र आगलागीको कारणबारे अनुसन्धान भइरहेको जनाएका छन् ।