सालिन मनको मलिन कथा, अभियुक्तले सफाइ पाए यता

निधारमा रातो अक्षताको टीका अनि रातोरंगको पहिरन, गलामा सुन्दर मालासहित धपक्क बलेको एउटी बालिकाको तस्वीर- गत वर्ष सामाजिक सञ्जाल र सञ्चारमाध्यमका भित्ताहरुमा निकै छाएको थियो, उनी निभेर गएपछि । कोपिलाबाट भर्खर फूलझैं फक्रिँदै गरेको सुन्दर र सालिन रुप फोटोमा देखिन्छ । 

तर, भाग्य नै खोटो रहेछ ! बाबुआमा भएर पनि टुहुरीझैँ थिइन् । राम्ररी फुल्नै नपाई चुँडिएर गएकी ती १४ वर्षीया बालिका सालिन पोखरेलको मुद्दामा चितवन जिल्ला अदालतले हालै प्रतिवादीहरुलाई सफाइ दिएको छ । आत्महत्या दुरुत्साहन मुद्दामा दाबी नपुग्ने ठहर गर्दै न्यायाधीश ध्रुवकुमार ढकालको इजलासले अस्ति सोमबार फैसला सुनाएको अदालतका सूचना अधिकारी अमृत विश्वकर्माले बताए । 

२०८० फागुन १२ गते बिहान सालिन आफ्नै स्कूलको होस्टेल कोठामा झुण्डिएको अवस्थामा मृत फेला परेकी थिइन् । आमाबाबुले होस्टेल र विद्यालय प्रशासनलाई दोषी ठहर्याउँदै प्रहरीमा किटानी जाहेरी दिएपछि विद्यालयका प्रिन्सिपल बालहरि देवकोटा, भाइस प्रिन्सिपल किरणबहादुर अधिकारी र होस्टेल वार्डेन कमलप्रसाद शर्मा पक्राउ परेका थिए ।

यस घटनामा सरकारी वकिल कार्यालयले २०८० चैत्र ४ गते उनीहरुविरुद्ध आत्महत्या दुरुत्साहन मुद्दा दर्ता गरेको भएपनि तीनैजना धरौटीमा बाहिरै थिए । 

आमाबाबुको बेमेल, सम्बन्ध विच्छेद वा भनौं पारिवारिक विखण्डनले धेरै बालबालिकाको जीवन बर्बादीतर्फ धकेलिने गरेको छ । सालिन पोखरेल पनि सानैदेखि बाबुआमाको झगडाको मारमा परेकी बालिका हुन् । आमाबुबा एकअर्कासँग छुट्टिएर अन्तअन्तै आ–आफ्नो अंगालो भरेर बसेको सुनिएको थियो । 

जेहोस्, उनीहरु अलग्गिएर लाखापाखा भएपछि आमाबाबुको काखबाट वञ्चित अभागी छोरी सालिन यता होस्टेलको कोठामा तड्पिँदै, निस्सासिँदै, छटपटिँदै मर्नुपरेको थियो । उनी आफ्ना मनका बह तथा भावनाहरु डायरीमा पोख्ने पनि गर्थिन् । मर्नुअघि उनले सुसाइडनोट र डायरीमा ममीबुबाको यादमा लेखेका कुराहरु पनि छन्  । 

रत्ननगर–१० को एकता शिशु निकेतन बोर्डिड्ड स्कूलमा होस्टेलमा बसेर सालिन कक्षा–८ मा पढ्दै थिइन् । सम्पूर्ण खर्च आमाबाबुले नै व्यहोर्दै थिए । तर, खाने–लाउने व्यवस्था गरिदिएर स्कूल पढाइदिँदैमा आमाबाबुको जिम्मेवारी कहाँ पूरा हुन्छ र ? बाआमाको माया, र काख पनि बालविकासको निम्ति अत्यन्त महत्वपूर्ण पक्ष हो भनी बालविज्ञ र मनोविद्हरुले बारम्बार भन्दै आइरहेको तथ्य हो ।  

अभिभावकको प्रत्यक्ष रेखदेखबाट वञ्चित बालबालिकाहरु हिंसा र दुव्र्यवहारको शिकार पनि अत्यधिक मात्रामा हुने गरेका छन् । सालिनको पनि स्कूलमा बलात्कार पछि हत्या भएको आशंका नगरिएको थिएन । तर, परीक्षण रिपोर्टबाट त्यस्तो देखिएन । 

मृत्युको कारण ह्याड्डिङ नै भएको पोष्टमार्टम रिपोर्ट आएको र सुसाइडको नोटको अक्षर पनि उनको आफ्नै भएको परीक्षणले देखाएको थियो । आत्महत्या नै भएपनि बच्ची त्यो अवस्थामा किन पुगिन् त ? सम्पूर्ण अभिभावकहरुले गम्भीर भएर आत्मसात गर्नुपर्ने एउटा महत्वपूर्ण विषय हो यो ।