रविन्द्र मिश्रको पुरानो काण्ड फेरि चर्चामा

वैकल्पिक राजनीतिलाई सडकमा अलपत्र छोडेर 'मार्ग परिवर्तन' भन्दै राप्रपामा मिसिएका व्यक्ति हुन्, पूर्वपत्रकार रविन्द्र मिश्र । ०६४/६५ सालतिर ढुंगामाटोसमेत गणतन्त्रवादी भएका बेला राजतन्त्रको बिऊ जोगाएका कमल थापाभन्दा कट्टर राजावादी भएर निस्किएका छन्, उनी अहिले । 

उनै नवराजावादी मिश्रले यसै साता निर्मल निवासको रोजाइमा ठूलै जिम्मेवारी हात पारे । त्यो हो, नवराज सुवेदी नेतृत्वको 'राजसंस्था पुर्नस्थापनको लागि संयुक्त जनआन्दोलन समिति' को सदस्य सचिव । शुक्रबार काठमाडौँको तीनकुनेमा राजावादीहरुले मच्याएको लुटपाट र आगजनी त्यहि समितिको आह्वानमा भएको हो । त्यसमा प्रत्यक्ष संलग्न रहेका मिश्रविरुद्ध फौजदारी अभियोगमा अनुसन्धान चलिरहँदा केही पुराना तथ्यहरु बाहिर आउन थालेका छन् । 

बिबिसी (लण्डन)मा हुँदा उनले तीन महिलामाथि यौन दुर्व्यवहार गरेको घटना अहिले सतहमा आएको हो । बेलायतमा मिश्रसँग लामो समयदेखि संगत गरेका व्यक्तिहरुले सामाजिक सञ्जालमा उक्त पुरानो घटना सम्झिएका छन् ।

भिष्मराज प्रधानले मिश्रको बोली मिठो भए पनि सोच र नियत पहिल्यैदेखि गलत रहेको टिप्पणी गरेका छन् । उनका अनुसार राम्रो अंग्रेजी लवजको कारण बिबिसीमा जागिर पाएका मिश्रमाथि तीन महिला सहकर्मीले यौन दुव्र्यवहारको आरोप लगाएका थिए । त्यससम्बन्धमा छानविन गर्न बिबिसी लण्डनले दुई वटा समितिसमेत बनाएको बताइन्छ । 

‘बिबिसीले कारवाही गर्नुअघि नै राजीनामा दिएर आफूलाई ठूलो देखाए, तर किन कारवाही गर्न खोजिएको थियो ? त्यो सार्वजनिक भएन’, प्रधानले भनेका छन्, ‘नेपाल फर्केर भ्रष्टाचारीको मुखमा किरा परोस् भन्दै विवेकशील साझा पार्टी बनाएर आफैँ चिहानमा गाडे, अनि अहिले फेरि राजावादीको मुखौटा लगाएर अर्को चरित्र देखाएछन् । पूर्व पत्रकारले पत्रकारको हत्या गर्नु झन् गम्भीर अपराध हो !’

त्यसो त, वरिष्ठ पत्रकार किशोर नेपालले समेत एउटा पुरानो ब्लगमा मिश्रले तीन महिला सहकर्मीमाथि यौन दुव्र्यवहार गरेको प्रसंग जोडेका थिए । तर, उनले संक्षेपमा उल्लेख गरेको कारण खासै चर्चामा आएन । 

‘रवीन्द्रमाथि तीनजना महिला कर्मचारीसँग दुर्व्यवहार गरेको आरोप लागेपछि छानविन गर्न बीबीसी व्यवस्थापनले लण्डनमा दुई-दुई पटक आन्तरिक र बाह्य ट्रिव्युनल गठन गरेको थियो । त्यही छानविनका आधारमा उनलाई नेपाल पठाइएको हो', पत्रकार नेपालको लेखमा उल्लेख छ, 'त्यसको केही समयपछि उनको सेवा समाप्त गरिन लागेको सूचना दिइएको थियो । बीबीसीको सेवामा रहेर बीबीसीको भन्दा आफ्नै प्रमोसन बढी गरेकोमा बीबीसी हेडअफिस बुस हाउसका अधिकारी सन्तुष्ट थिएनन् ।’

यीनै रविन्द्रहरुको उक्साहटमा भड्किएको राजावादी बितण्डामा परी एक जना पत्रकारसहित दुई जनाको दु:खद निधन भएको छ । उक्त दिन आफ्ना समर्थकलाई अराजक बन्न यिनीहरुले नउक्साएको भए हिँसा भड्किने थिएन भन्ने सुरक्षा विश्लेषण छ । 

त्यसैका आधारमा मिश्रसहित ७१ जनाविरुद्ध हत्या र संगठित अपराध कसुरमा मुद्दा चलाउने सरकारको तयारी छ ।