कहिले सुभाषलाई, कहिले अग्निलाई

सत्यनिरूपण तथा मेलमिलाप आयोगसम्बन्धी विषय फेरि चर्चामा छ । प्रधानमन्त्री केपी शर्मा ओलीले आफ्नै जिल्ला झापाका वरिष्ठ अधिवक्ता तथा पूर्व कानुनमन्त्री अग्नि खरेललाई मानवअधिकार तथा संक्रमणकालीन न्यायसम्बन्धी सल्लाहकारमा नियुक्त गरेसँगै यो विषयले थप चर्चा पाएको हो । फागुन तेस्रो साता मन्त्रिपरिषद्ले प्रधानमन्त्रीको विज्ञ सल्लाहकारमा नियुक्त गरेसँगै एउटा प्रश्न भने धेरैको मनमा उठेको थियो– के प्रधानमन्त्री र खरेलबीचको दूरी घटेको हो ? एमालेनिकट स्रोत भन्छ, ‘त्यसो होइन । बरु होचाहिँ के भने झापामा समेत आफ्नो खेमा कमजोर हुने र अग्नि खरेल पनि विद्या भण्डारीतिर लाग्ने लक्षण देखेपछि असन्तुष्टिको व्यवस्थापनसम्म गरिएको हो ।’ तर, राम्रो के भैदियो भने खरेल पाएको जिम्मेवारीमा निकै सक्रियताका साथ खरेल लागिपरेका छन् । उनले एमाले अध्यक्ष ओली, कांग्रेस सभापति देउवा र माओवादी अध्यक्ष प्रचण्डबीच चैत ११ गते सोमबार भेटघाट गराएर तदारुकताका साथ काम अघि बढाइसके । 

त्यसो त झापा क्षेत्र नम्बर २ बाट चुनाव लड्ने तयारीसाथ अग्निले बिर्तामोडमा घरजग्गा नै किनेर स्थायी बसोबासको थालनी गरिसकेका थिए । अध्यक्ष ओलीले नै झापा २ बाट तयारीमा लाग्न आदेश दिएपछि उनी क्षेत्र नम्बर ५ छोडेर त्यता सरेका हुन् । तर, पछि टिकट वितरणको बेला देवराज घिमिरेलाई उठाएर खरेललाई जित्ने सम्भावना निकै न्यून रहेको क्षेत्र नम्बर १ मा कांग्रेस महामन्त्री विश्वप्रकाश शर्मासँग भिड्न पठाए । यसरी अध्यक्षले आफूलाई यताबाट उता र उताबाट त्यता हुत्याउँदै अन्त्यमा बलिको बोको बनाएको निश्कर्ष निकाल्दै खरेलले चित्त दुखाए । त्यही चित्त दुखाइ प्रकट गर्दै निकटस्थहरूसँग भन्दै पनि आएका थिए, ‘अब मलाई त्यताको मान्छे नभन्नुस् ।’ 

त्यसो त कतिपयले के पनि अनुमान लगाएका छन् भने पक्कै पनि ओलीले संविधान संशोधनको बुँदा के–के हुन् भन्ने केलाउन मान्छे चाहिएर उनलाई नियुक्त गरेको हुन सक्छ । त्यसैगरी संक्रमणकालीन न्यायलाई उचित ढंगले व्यवस्थापन गर्नसक्ने व्यक्तिका रूपमा पनि उनको क्षमताको कदर गरिएको हुन सक्छ । मोरङमा केपी ओली पक्ष पराजित भएर जिल्ला अधिवेशनमा विनोद ढकाल हावी बनेपछि बालुवाटारको किचेन क्याबिनेट तर्सिएको विश्लेषण गरिँदैछ । उता झापामा पनि कमजोर होइने भएपछि एक हप्ता अधिवेशन तन्काइएको थियो । 

अग्नि खरेललाई यसअघि सत्यनिरूपण तथा मेलमिलाप आयोगको अध्यक्ष बनाउन केपी ओली स्वयंले प्रस्ताव गरेका थिए । त्यसबेला माओवादीहरूले उनलाई खासमा अध्यक्ष बनाउन प्रस्ताव गरिएकै होइन । साइजमा राख्न मात्रै प्रसंग छेडिएको हो, त्यसकारण यसमा धेरै आशावादी नबन्नुस् भन्ने सुझाव दिएका थिए । केपी ओलीनिकट नेताहरू नै भन्ने गर्छन्– अग्नि खरेललाई टिआरसी अध्यक्ष र सुवास नेम्वाङलाई राष्ट्रपति पदको प्रस्ताव बनाउने हैन नबनाउने उद्देश्यले गरिएको थियो । 

अहिले भने अग्नि खरेल सबैसँग घनीभूत छलफलमा जुटेका छन् । सिंहदरबारस्थित प्रधानमन्त्री कार्यालयकै पहिलो तलामा एउटा विशाल कार्यालय खडा गरेर त्यहीं मान्छे बोलाउने र छलफल गर्ने गरिरहेका छन् । संविधान संशोधनको विषयमा भने अग्नि खरेलले कुनै काम गर्नु नपर्ने देखिएको छ । कतिपय उच्च नेता भन्छन्– वास्तवमा संविधान संशोधन त एउटा बहाना मात्रै थियो । संशोधन एमाले न कांग्रेस– कसैलाई पनि चाहिएको छैन । बरु संसदका दुई ठूला दलको गठबन्धन केका लागि भन्ने औचित्यता पुष्टि गर्न मात्र त्यो विषयलाई अगाडि सारिएको थियो ।