एकता राख्ने वा भाँड्ने जिम्मा ओलीको हातमा

सर्वोच्च अदालतको फागुन २३ गतेको आदेशले अरु जे भएपनि एमालेको मजबुत संगठनलाई फेरि एकपटक एकतापूर्ण बनाउँदै अघि बढाउन नसोचेको मार्ग प्रशस्त गरेको छ । तर,सँधै चलाखीको राजनीति गर्दै आउनुभएका प्रधानमन्त्री केपी शर्मा ओलीले त्यसपछि पनि त्यहि बाटो रोज्नुभएको देखियो । अदालतको आदेश पालना गर्ने क्रममा विधानबमोजिम बैठक बोलाउन र आवश्यक छलफलसहितको निर्णय गर्न छाडेर एकाएक फागुन २८ गते आफ्नो कोर ग्रुपको छलफललाई केन्द्रीय समितिको बैठकको नाम दिने प्रयास भयो ।

अहिले त्यहि गुटको भेला र छलफलको विषय नै एमालेभित्र पेचिलो बनेको छ । विधानको न्यूनतम प्रक्रिया नै नपुर्याई डाकिएको भनिएको उक्त भेला सर्वाधिक विवादित बनेको छ । हिजो पार्टी मुख्यालय धुम्बाराहीमा भएको एमालेका दुई पक्षबीचको वार्ताले समेत प्रधानमन्त्री ओली छलकपटबाट बाहिर आउनुहुन्छ कि हुँदैन भन्ने विषयलाई बटम लाइन बनाएको छ । एमालेको एकता र आगामी भविश्यको सबैभन्दा धेरै अंश त्यसैले निर्धारण गर्ने बताइन्छ ।

तुलनात्मक रुपमा सोमबार धुम्बाराहीको भेटवार्तामा नेताहरूबीच त्यति धेरै घोचपेच नभएको सहभागी एकजना नेताले बताउनुभएको छ । उहाँका अनुसार दुवै पक्षले आ-आफ्ना कुरा राखेका थिए । माधव नेपाल पक्षले हाम्रो बटम लाइन भन्दै फागुन २३ गतेपछि गरिएका पार्टीका सबै कामकारबाहीलाई शून्यमा झार्नुपर्ने अडान लिएको थियो । तर प्रधानमन्त्री ओलीले नमान्ने भन्दै ‘अहँ’ भन्नुभयो । कुराकानीको बातावरण राम्रो भएपनि सारमा ‘कुरा मिलेन’ भनेर नेताहरू उठेका थिए ।

बालुवाटार निकट नेताहरूको प्रस्तुति र भाव कस्तो थियो भनेर राखिएको जिज्ञासामा एकजना सहभागी नेताले भन्नुभयो ‘सँधै चियरफुल मुडमा देखिने सुवास पनि हिजो उदास अनुहारमा बस्नुभयो । महासचिव ईश्वर पोखरेल र विष्णु पौडेलको मुड र चेहरा उज्यालो थिएन । पोखरेल त पूरै समय घोसे मुण्टो लगाएर बस्नुभयो ।’

प्रस्तुतिको क्रममा पनि प्रायः उग्र र बाँङ्गो कुरा गर्ने ईश्वर हिजो प्रधानमन्त्रीले बोलाएको चियापान कसरी रोक्ने भनेबाहेक अरु सवालमा मत्थर हुनुभएको बताइन्छ । प्रधानमन्त्री ओलीले भने आफ्नै स्टाइलले कुरा राख्नुभएको थियो । तर,टोन निकै ‘लो’ रहेको बताइन्छ ।

आफ्नो लागि ७० वर्षको उमेर हद हटाउन र बादलहरूलाई एमालेमा भित्र्याउन पहिले विधान संशोधन गरेको र अर्को बैठकले निर्णय गराएको देखाउन एकैछिनमा दुईवटा बैठक गरेर २८ गते परिपक्व निर्णयको नाटक गरेको हुनसक्ने बताइएको छ ।

त्यहि बैठकलाई जोड दिँदै वार्ताको क्रममा प्रधानमन्त्रीले एक पटक भन्नुभएको थियो ‘उता छाडेर यता आएकालाई उनीहरूको हैसियत त प्रमाणिकरण गरिदिनुपर्यो नि’ भन्नुभएको थियो ।

हिजोको भेटघाटलाई प्रधानमन्त्रीले भित्री मनदेखि भन्दापनि मैले ‘स्पेश’ राखेको छु भन्ने देखाउन र अधिकतम प्रयास गरेको छु भन्ने भान पार्न कुराकानी थालेको बुझ्नेहरू पनि प्रशस्तै छन् । सम्भवतः नेपाल पक्षले भोलि र पर्सि बोलाएको कार्यकर्ताहरूको राष्ट्रिय भेलालाई असर पार्ने मनशाय रहेको विश्लेषकहरूको दाबी छ ।

अर्कोतर्फ अन्य दलहरू मिलेर सरकार बनाउन गरेको कसरतलाई कसरी ‘डिफ्युज’ गराउन सकिन्छ भन्दै रचिएको खेल भन्नेहरू पनि छन् । एमालेभित्रै र माओवादी केन्द्रका अध्यक्षसँग सम्बन्ध सुधारको लागि प्रधानमन्त्री ओलीले एक कदम पछाडि हटेर गर्नुभएको वार्ताको पहलले काँग्रेस र जसपालाई गतिलो झट्का र मनोविज्ञान दिलाउने निश्चित छ ।