मध्यराती लागूऔषधसहित पक्राउ

गए राती प्रहरीले स्युचाटारबाट ठूलो परिमाणमा लागूऔषधसहित एक जनालाई पक्राउ गरेको छ । नागार्जुन नगरपालिका, स्युचाटारस्थित गौतम गाउँका सूर्यप्रसाद गौतमको घरमा भाडामा बस्ने आङ्जु शेर्पाको कोठाबाट लुकाइछिपाई अवस्थामा राखेको लागूऔषध कालिमाटीबाट खटिएको प्रहरीले बरामद गरेको हो ।

सोलुखुम्बु जिल्ला दूधकुण्ड नगरपालिका-११ घर भई स्युचाटार बस्ने ३६ वर्षीय शेर्पाको कोठाबाट टोलीले चेकजाँच गर्ने क्रममा बा ८९प २३४१ नं को मोटरसाइकलसहित विभिन्न पाँच किसिमका ३ हजार २ सय ६८ थान लागूऔषध बरामद गरेको जनाएको छ ।

बरामद लागूऔषधमा डाइजेपाम एम्पुल ६ सय ८२ थान,फनरागन एम्पुल ७ सय ८६थान,लुपिजस एम्पुल १ सय ८० थान,नुफिन एम्पुल ४ सय २० थान,नाईट्राभ्याट ट्याबलेट १२ सय थान छन् ।

लागूऔषधसहित नियन्त्रणमा लिई महानगरीय प्रहरी वृत्त कालिमाटी ल्याएर अनुसन्धानमा राखिएका शेर्पाको साथमा रहेको मोबाइल २ थान,नगद ६० हजार र सुन जस्तो देखिने धातुको १ थान औंठी पनि प्रहरीले बरामद भएको जनाइएको छ ।