शुरु हुँदै एमालेको राष्ट्रिय कार्यकर्ता भेला

नेकपा एमालेको राष्ट्रिय कार्यकर्ता भेला केहीबेरमा शुरु हुँदैछ । सानेपास्थित हेरिटेज गार्डेनमा हुन लागेको भेलामा देशभरबाट एमाले कार्यकर्ता कार्यक्रमस्थलमा प्रवेश गरिसकेका छन् ।

भेलामा देशभरबाट तीन हजारभन्दा बढी नेता–कार्यकर्ता सहभागी हुने जनाइएको छ । केन्द्रीय सदस्य दिलु पन्तका अनुसार भेलाका लागि केन्द्रीय सदस्यहरू, केन्द्रीय निकायका सदस्यहरू, जनवर्गीय संगठनका केन्द्रीय सदस्यहरू, प्रदेश कमिटीका पदाधिकारी, जिल्ला कमिटीका पदाधिकारी, संघ तथा प्रदेशका सांसदहरू, समन्वय समितिका प्रमुख र उपप्रमुख, स्थानीय तहका प्रमुख र उपप्रमुख सहभागी हुँदैछन् ।

भेलाको उद्घाटन कार्यक्रमलाई वरिष्ठ नेताद्वय झलनाथ खनाल र माधवकुमार नेपालले सम्बोधन गर्ने उनले जानकारी दिइन् । फागुन २८ गते प्रधानमन्त्री तथा अध्यक्ष केपी शर्मा ओलीले एकलौटी रुपमा केन्द्रीय कमिटी पुनर्गठन, नेताहरूको जिम्मेवारी हेरफेर र महाधिवेशनको मिति तोक्ने निर्णय गरेपछि वरिष्ठ नेता खनाल र नेपाल पक्षले छुट्टै कार्यकर्ता भेला बोलाएको हो ।

भेला भोलिसम्म चल्नेछ । देशभरबाट सहभागी सदस्यहरूले दिने सुझावका आधारमा आगामी रणनीति तय गर्ने आयोजक पक्षको तयारी छ ।