भेलामा झापा आन्दोलनका पहिलो गुरिल्ला कमाण्डर पनि देखिए

झापा आन्दोलनका पहिलो गुरिल्ला कमाण्डर मोहनचन्द्र अधिकारी नेकपा एमाले माधव पक्षको राष्ट्रिय कार्यकर्ता भेलामा पुग्नुभएको छ । ८४ वर्षीय अधिकारी भर्खरै भेलामा आइपुग्नुभएको हो ।

अधिकारीले आफूले बनाएको पार्टीको कार्यक्रममा सहभागी हुन पाउँदा खुशी लागेको बताउनुभयो । ‘यो पार्टी ०२४ सालमा म समेतले बनाएको हो, आज यहाँ आउँदा खुशी लागेको छ,’ उहाँले भन्नुभयो ।

एमालेमा दुई धार देखिएकोबारे अधिकारीले आफूले क्रान्तिकारी पार्टीलाई साथ दिने बताउनुभयो ।

त्यसैगरी भेलामा नेताहरु सिद्धिलाल सिंह,प्रदिप नेपाल, कमल कोइराला र राधाकृष्ण मैनालीको समेत सहभागिता रहेको छ ।

एमाले अनुशासन आयोगका अध्यक्ष अमृत बोहोरा, ३ जना उपाध्यक्ष, २ जना सचिव एकजना उपमहासचिव र अन्य धेरैजना जेष्ठ कम्युनिष्टहरु भेलामा उपस्थित भइसक्नुभएको छ ।