बलात्कारी अधवैंशे,खुकुरी हान्ने र जुवाडे खोरमा

जबरजस्ती करणीको अभियोगमा प्रहरीले एक अधवैंशेलाई पक्राउ गरेको छ । कैलाली, लम्कीचुहा नगरपालिका–१ झुङ्गा टोल बस्ने ४६ वर्षीय रामबहादुर चौधरीले स्थाजुनीय ३६ वर्षीया महिलालाई जबरजस्ती करणी गरेको अभियोगमा शनिबार राति प्रहरीले समातेको हो ।

उता, खुकुरी प्रहार गरेर घाइते बनाउने दुई जना पनि हिजै समातिएका छन् । पथरी शनिश्चरे नगरपालिका–८, मिलन चोक बस्ने २२ वर्षीय कृष्ण मगरलाई धारिलो हतियार खुकुरी प्रहार गरी घाइते बनाएको अभियोगमा सोहि नगरपालिका–६ बस्ने २२ वर्षीय निरोज गोदी र १९ वर्षीय धिराज गोदीलाई प्रहरीले पक्राउ गरेको हो ।

पुरानो रिसइबीका कारण उनीहरुले कृष्णलाई स्थानीय राम जानकी मन्दिर छेउमा खुकुरी प्रहार गरेका थिए । घाइते कृष्णको नोबेल अस्पताल विराटनगरमा उपचार भइरहेको प्रहरीले जनाएको छ ।

यसवीच तनहुँको आँबुखैरेनीमा तास खेलिरहेका ७ जनालाई प्रहरीले पक्राउ गरेको छ । आँबुखैरेनी गाउँपालिका ३ स्थित मनबहादुर श्रेष्ठको घरमा तास खेलिरहेको अवस्थामा उनीसहित समातिएका हुन् ।

श्रेष्ठको घरमा तास खेलिरहेको विशेष सूचनाको आधारमा जिल्ला प्रहरी कार्यालय तनहुँ र इलाका प्रहरी कार्यालय,आँबुखैरेनीबाट खटिएको प्रहरीले उनीहरुलाई नगद १ लाख ११ हजार ४ सय ४० रुपैयाँ र १३ बुक ताससहित पक्राउ गरेको प्रहरीले बताएको छ ।