बिहीबार रातिदेखि काठमाडौंमा निषेधाज्ञा

कोरोना संकट व्यवस्थापन केन्द्र (सीसीएमसी) को हिजोको बैठकले सिफारिश गरेबमोजिम आज बेलुका बस्ने क्याबिनेट बैठकले काठमाडौं उपत्यकालगायत तीब्र रुपमा कोरोना संक्रमण फैलिएका जिल्ला र क्षेत्रमा अहिले स्थानीय प्रशासनले जारी गर्ने निषेधाज्ञा अनुमोदन गर्ने भएको छ । उपत्यकाका तीन जिल्ला काठमाण्डौ,ललितपुर र भक्तपुरको हकमा आगामी बिहिवार राती १२ बजेदेखि हाललाई एक हप्तासम्म दूध,तरकारी,ओखती बोकेका गाडी,एम्बुलेन्स,शववाहन,चिकित्सक,सुरक्षा र सन्चारकर्मी तथा सरकारी निकायका गाडीबाहेक बिशेष इजाजतबिनाका अरु सबै सवारी साधन ठप्प हुनेछन् । अफिस जाने कर्मचारीबाहेक सर्वसाधारणको हिंड्डुलमा पनि रोक लाग्नेछ ।

५ सयभन्दा बढी संक्रमित भएका नगर र जिल्ला तथा २ सय भन्दा बढी संक्रमित भएका गाउँपालिकामा स्वतः निषेधाज्ञा लगाउने गरी निर्णय हुने स्रोतको दाबी छ । काठमाडौं उपत्यकामा सीसीएमसीले तोकेको भन्दा बढी संक्रमित देखिइसकेको छ ।

निषेधाज्ञा गर्दा के केमा प्रतिबन्ध लगाउने भन्ने विषयमा शर्त तथा आवश्यक निर्णय गर्ने अधिकार भने सम्बन्धित जिल्लाका सीडीओलाई दिइनेछ ।

यसैबीच विदेशबाट जहाज चढेर नेपाल भित्रिने यात्रुले १० दिन अनिवार्य क्वारेन्टिनमा बस्नैपर्ने नियम बनाइएको छ ।

विभिन्न ठाउँमा हुने निषेधाज्ञाको कारण आन्तरिक उडान स्वतः कटौति हुने बताइएको छ । उता, हिमाल आरोहणलाई भने यथावत राखिएको छ । पीसीआर रिपोर्ट अनिवार्य गर्दै हेल्थ प्रोटोकल पालना गर्न लगाइएकाले हिमाल आरोहणको क्षेत्रमा कुनै समस्या नरहेको सरकारी अधिकारीहरुको दाबी छ ।