समातेर चीन लगिनेको खास संख्या
गार्मेन्टजस्तो ठाउँ, काम दिनरातै चलिरहने । खाने, बस्ने, सुत्नेदेखि शौचालयसम्मको व्यवस्था भित्रै । काठमाडौं बसी–बसी चीनका पुरुष ‘मुर्गा’ भए महिलाले र महिला भए पुरुषले यताबाट जालमा पार्ने धन्दा चलिरहने । तर, महिनौँदेखि यस्तो अपराध हुँदासम्म सुरक्षासम्बद्ध मजबुत सूचना प्रणालीको अभावमा धन्दा झन्झन् मौलाउँदो थियो ।
नेपालको सहज अध्यागमन व्यवस्था र फितलो सुरक्षा प्रणालीको फाइदा उठाउँदै यी चिनियाँले उतै बस्ने नागरिकलाई यहाँबाट फकाएर, तर्र्साएर वा प्रलोभनमा पारेर ठूलो मात्रामा आर्थिक अपचलन गरिरहेका थिए । एउटा क्वार्टरमा १२ देखि १५ जनासम्म बस्ने र चीनमा क–कसका पति–पत्नीबीच खट्पट छ, त्यहाँ निशाना लगाएर पतिसँग भए महिलाले, पत्नीसँग भए पुरुषले वि च्याटदेखि विभिन्न जुवाजन्य अनलाइनमार्फत आर्थिक लगानी गर्न प्रेरित गर्ने खेल हो यो ।
लगानीमात्रै गराएर त समस्या थिएन, शुरुमा भनिएकै विषयमा रकम हाल्न लगाउने, पछि थप रकम माग्ने क्रममा सिरीखुरी सोत्तर पारिदिने क्रम बढेको थियो । पीडितहरूले चिनियाँ सुरक्षा निकायमा आफ्नो पीडा पोखेपछि अनुसन्धान शुरु भयो । पत्ता लाग्यो, त्यस्तो काम गर्न विभिन्न देशबाट चिनियाँ नागरिक काठमाडौं पुगेका छन् ।
चीनले डेढ साताअघि गुप्तचर निर्देशकसहित ६ जनाको एउटा टोली काठमाडौं पठायो । यो टोली सबभन्दा पहिला अध्यागमन विभागमा कुरा बुझ्न पुग्यो । साइबर क्राइमदेखि विभिन्न अपराधमा चीनको फुजियान प्रान्तका बासिन्दा बढी संलग्न भएको उनीहरूको दावी थियो । फुजियान भनेको चीनविरोधी भूमि ताइवानको वारिपट्टि पर्छ । त्यहाँका विभिन्न अपराधीहरू श्रीलंका, फिलिपिन्स, कम्बोडिया, मलेसिया, भियतनाममा छरिएर रहेका छन् । नेपालमा बसेर नेपालकै सुरक्षामा त उनीहरूले त्यति चुनौति दिएका छैनन्, तर चीनलक्ष्यित कुनै–कुनै अपराधमा संलग्न भएको चिनियाँ गुप्तचर टोलीको निश्कर्ष थियो ।
सजिलो पनि कस्तो भने, नेपाल आउन चिनियाँ नागरिकलाई भिसा शुल्क लाग्दैन, सीधै काठमाडौं एयरपोर्टमा टेक्नासाथ सित्तैमा एक सय ५० दिन बस्न पाइन्छ । पहिलो लटमा तीन सय हाराहारीमा चिनियाँ अपराधी लिएर जाने उताका गुप्तचरको भनाइ थियो । अधयागमनका महानिर्देशक इश्वर पौडेलसामु फाइल पल्टाएर देखाइएको हिसाबअनुसार सबै गर्दा हजारजति आफ्ना नागरिक नेपालमा सल्बलाएको उनीहरूको अनुमान छ ।
उनीहरूले यिनलाई सीधै उठाएर चीन लैजानका निम्ति कम्तीमा तीनवटा चार्टर फ्लाइट चाहिने बताएका थिए । त्यस्ता व्यक्तिलाई लान सुपुर्दगी सन्धि नभएका कारण समस्या त छ । तर, चिनियाँहरूको पनि राय छ, राष्ट्रपति सि चिनफिङको भ्रमणका बेला भएको सम्झौताअनुसार, उच्चस्तरको समन्वय, अपराध र अपराधीबारे सूचना आदानप्रदान र एकापसमा सहयोग गर्ने भन्ने विषयमा टेकेर लैजान सकिन्छ वा प्रहरीले अवैधानिक आप्रवासी तथा संगठित अपराधको कसुरमा संलग्न भनी अध्यागमनमा पेश गरे फिर्ता पठाउने व्यवस्था छ ।
सो टोलीले दूतावासमार्फत सीधै आइजिपी सर्वेन्द्र खनालसँग कुरा ग¥यो । खनालले सूचना पाउनासाथ केन्द्रीय अनुसन्धान व्युरो (सिआइबी) र अपराध महाशाखालाई एक साताअघि २४ घण्टाको म्याद दिएर तथ्य पहिल्याउने जिम्मेवारी दिए । सूचना चुहावटको जटिल समस्यामा रहेको प्रहरीबाट यो काम समयमै सम्पन्न हुनेमा चिनियाँ गुप्तचर विश्वस्त थिएनन् । तर, आइतबार साँझ आइजिपी खनालले नक्सालस्थित आफ्नो सरकारी निवासमा सिआइबी, अपराध महाशाखा र काठमाडौं प्रहरी परिसरका प्रमुखहरूलाई बोलाएर भोलिपल्ट दिउँसो ३ बजेभित्र आफूलाई रिजल्ट चाहिएको बताएपछि आइतबार रातभरमा यी तीनै टोलीले विभिन्न अखडा पहिचान गरेको हो ।
सोमबार बिहान बालाजु, नयाँबसपार्क, तिलिंगेटार र महाराजगञ्जका प्रहरी युनिटलाई दिउँसो २ बजेसम्म काम सिध्याउने गरी स्ट्याण्डबाई राखिएको थियो । तर, अनुमानित समयअगावै, अर्थात् १ बजेभित्रै पहिचान भएका अखडाबाट शंकास्पदहरू नियन्त्रणमा आए ।
यो अपरेशनका सन्दर्भमा दूतावास र प्रहरी हेडक्वार्टरबीच नियमित सम्पर्क थियो । मानिसहरू पक्राउ परेको सूचना हेडक्वार्टरले दिनासाथ दूतावासले बेइजिङमा खबर पठायो । र, उताबाट खबर आयो, ती व्यक्तिलाई अवैधानिक आप्रवासीको रूपमा सम्बन्धित देश फिर्ता पठाउने कानुनअनुसार कागज बनाउन नेपाल सरकारलाई अनुरोध गर्ने । यसअनुसार, सोमबारबाटै प्रक्रिया शुरु भएको छ ।
केही दिनका लागि संगठित अपराध मुद्दामा म्याद थपेर एक सय २२ चिनियाँमाथि कारबाही अगाडि बढ्ने र बेइजिङबाट उनीहरूलाई लिन आउने चार्टर जहाज अवतरण हुनासाथ अध्यागमन कानुन लगाएर पठाउने योजना छ । अथवा, चीनले चाह्यो भने उनीहरूको राहदानी रद्द गर्न र फेरि नेपाल प्रवेशमा रोक लगाउन सक्ने व्यवस्था पनि छ ।
ट्रेन्डिङ पोस्ट
टिप्पणीहरू