छोराले हिर्काउँदा ८० वर्षीय बाबुको मृत्यु

मोरङमा एक युवाले आफ्नै ८० वर्षीय बाबुको हत्या गरेका छन् । बेलबारी नगरपालिका-९ डाँगाबजारका ३५ वर्षीय जय बहादुर खत्रीले बाबु दलबहादुर खत्रीलाई कुटेर हत्या गरेका हुन् ।

हत्याको आरोपमा जय बहादुरलाई प्रहरीले पक्राउ गरेको छ । आफ्नै बाबुलाई कुटपिट गरी हत्या गरेको आरोपमा उनलाई गएराति नियन्त्रणमा लिएको जिल्ला प्रहरी कार्यलय मोरङले जनाएको छ ।

प्रहरीका अनुसार मादक पदार्थ सेवन गरेका जयबहादुरले घरायसी विषयमा वादविवाद हुँदा बुबा दलबहादुरलाई कुटपिट गरेका थिए ।

छोराको कुटपिटबाट दलबहादुरको मृत्यु भएको खबर पाउनासाथ अस्थायी प्रहरी चौकी डाँगाबजार र प्रहरी कार्यालय बेलबारीबाट खटिएको प्रहरी टोलीले उनलाई पक्राउ गरी थप अनुसन्धान गरिरहेको छ ।