मापसे गरेर चलाइएको मोटरसाइकलले भक्तपुरमा दुई जनालाई घिसार्यो

भक्तपुरमा मादक पदार्थ सेवन गरेर चलाएको एउटा मोटरसाइकलले बाटोमा हिँडिरहेका दुई जनालाई ठक्कर दिँद सख्त घाइते भएका छन् । चाँगुनारायण नगरपालिका ९ स्थित भट्टा पागोखानीमा आज साँझ मोटरसाइकलको ठक्करबाट उनीहरु घाइते भएका हुन् ।

प्रदेश नम्बर २–०३–०३० प ४६४७ नम्बरको मोटरसाइकलले पैदल यात्रीहरुलाई ठक्कर दिएपछि घाइतेहरुलाई भक्तपुर अस्पताल लगिएको थियो । मोटरसाइकल चालक चाँगुनारायण नगरपालिका ९ ताथली बस्ने वर्ष ३२ को सत्यनारायण गिरीले मापसे सेवन गरेको प्रहरीले बताएको छ ।

मोटरसाइकलको ठक्करबाट घाइते भएकामा बाराको जितपुर उपमहानगरपालिका १० घर भई हाल ताथली बस्ने वर्ष ४० को शम्भु लालदास हुन् । उनको दायाँ खुट्टा दायाँ हात र टाउको पछाडि भित्री चोट लागेको बताइन्छ ।

त्यसैगरी ९ ताथली बस्ने वर्ष ५० का रामप्रसाद साखकमीको बायाँ घुँडा र कानमा चोट लागेको उनका छोरा राजीव साखकमीले बताएका छन् ।