माओवादीको किल्लामा काँग्रेस नेताले कर्मचारी भकुरे, अध्यक्ष मुकदर्शक

रुकुम–पश्चिमको बाँफिकोट गाउँपालिकाका एक कर्मचारी कार्यकक्षमै कुटिएका छन् । सत्तारुढ नेपाली काँग्रेसको युवा संगठन तरुण दल बाँफिकोट गाउँपालिकाका अध्यक्ष राजु शाहीले कार्यालयका सब–इञ्जिनियर दिपक शाहमाथि कुटपिट गरेका हुन् ।

गाउँपालिका अध्यक्ष जनकुमार बाँठामगरकै अघिल्तिर शाहीले कुटपिट गरेको शाहको आरोप छ । प्राविधिकमाथि कुटपिट हुँदा पनि अध्यक्ष बाँठा मुकदर्शक बनेको भन्दै कर्मचारी आक्रोशित बनेका छन् । कर्मचारीमाथि कुटपिट गर्ने शाहीलाई इलाका प्रहरी कार्यालय बाँफिकोटले नियन्त्रणमा लिएको छ ।

उनलाई थप कारबाहीका लागि जिल्ला पठाउने तयारी भइरहेको प्रहरीले बताएको छ । आफूमाथि कुटपिट भएपछि पीडित शाहले कारबाहीका लागि निवेदन दिएका छन् । आफूले भनेजस्तो काम नगरिदिएको भन्दै प्राविधिक शाहमाथि शाहीले कुटपिट गरेको अरु कर्मचारीले बताएका छन् ।