१२ किलो गाँजासहित तीन जना समातिए

अवैध लागूऔषध गाँजासहित तीन जना समातिएका छन् । जिल्ला धादिङ गल्छि गाउँपालिका १ बस्ने २९ वर्षीय सरोज कुमार राई, सोही ठाउँका २२ वर्षीय रविन मगर र काभ्रे चौबास गाउँपालीका ८ की ५१ वर्षीया बिमला गुरुङलाई प्रहरीले अस्तिराति अन्दाजी १२ बजेको समयमा नागढुङ्गा चेकप्वाइन्टबाट नियन्त्रणमा लिएको हो ।

त्रिशुलीबाट काठमाडौतर्फ आइरहेको बा.५ ख ८२३५ नं को यात्रुवाहक बसमा सवार बिमलाको साथबाट प्रहरीले चेकजाँचको क्रममा छ किलो ग्राम गाँजा बरामद गरिएको छ ।

यसैगरी धादिङबाट काठमाडौतर्फ आउँदै गरेको बा ४ ख २८८३ नम्बरको यात्रुबाहक बस चेकजाँचको क्रममा लागूऔषध गाँजा छ किलोग्राम, मोबाइल तीन थान र चार थान सिम बरामद गरिएको प्रहरीले जनाएको छ ।

तीनै जनालाई नियन्त्रणमा लिएर लागूऔषध नियन्त्रण ऐन, २०३३ को कसूरमा काठमाडौ जिल्ला अदालतबाट सात दिनको म्याद थप गरी प्रहरी बृत्त थानकोटबाट अनुसन्धान भइरहेको प्रहरीले बताएको छ ।