नेतालाई माला लगाएको हातले नवजात शिशुको लाश च्याप्नुपर्दा…

काठमाडौं उपत्यकासँगैको काभ्रेपलाञ्चोक जिल्लाका अधिकांश गाउँपालिकामा अझै पनि सडक पूर्वाधारको गतिलो व्यवस्थापन हुन सकेको छैन । सडक भएपनि व्यवस्थित नहुँदा त्यहाँका सर्वसाधारणले पाएको दुःखको कुनै सीमा छैन ।

भौतिक पूर्वाधारको अभावका कारण कतिसम्म पीडा खेप्नुपर्छ भन्ने उदाहरण भुम्लु गाउँपालिकामा हालैको एउटा घटनाले देखाउँछ । वडा नम्बर १ सापिङकी संगिता माझीलाई गत भदौ ११ गते सुत्केरी व्यथाले च्याप्यो ।

उनलाई व्यथाले च्यापेपछि उनका श्रीमान कृष्ण माझीले अस्पताल पुर्याउन एम्बुलेन्स बोलाए । तर, जाँदै गरेको एम्बुलेन्स बीच बाटोमा नै फस्यो । एक घण्टासम्म एम्बुलेन्स निकाल्न नसकेपछि संगीताले बाटोमै छोरीलाई जन्म दिइन् ।

संगीता सुत्केरी त भइन् तर उनले आफ्नो छोरीलाई खेलाउनसमेत पाइनन् । स्वास्थ्यकर्मी नहुँदा उनको भर्खरै जन्मेकी छोरीको ठाउँको ठाउँ प्राणान्त भयो । वडामा एम्बुलेन्सको अभाव र जीर्ण सडकका कारण धर्तीमै टेक्न नपाउँदै आफ्नो छोरीको ज्यान गएको भन्दै पिता कृष्ण अहिले पनि भक्कानिन्छन् ।

छोरीको निम्ति थुप्रै सपना बुनेका उनको आँखा उक्त घटना सम्झिएपछि अहिले पनि रसाउन थाल्छन् । ‘आफ्नो मुटुको टुक्रालाई मृत अवस्थामा देख्दाको अवस्था म कल्पना पनि गर्न सक्दिन’, उनले भने ।

उक्त घटना सम्झेपछि एकोहोरो टोलाउँदै आफ्नो मनको पीडा पोख्न थालिहाल्छन् । ‘छोरी बाँचेकी भए अहिले खेलिरहेकी हुन्थी होली’ भन्दै भावुक हुन्छन् । जनप्रतिनिधिहरुले सडकको गुणस्तरमा ध्यान नदिँदा जन्मिन नपाउँदै एउटी शिशुले ज्यान गुमाउनुपरेको उक्त घटना प्रतिनिधिमूलक मात्रै हो ।

‘सबै बाबुआमालाई आफ्नो सन्तान मुटुको टुक्रा सरह हुन्छ । आफ्नो सन्तानको लाश हातमा लिएर बीच सडकमा उभिँदाको अवस्थाभन्दा पीडादायक कुरा अरु के हुन सक्छ ? यो दृश्य देख्दा कसको मन रुँदैन्, होला ?’ उनले प्रश्न गरे ।

उक्त विपन्न परिवारका पिताको पीडा निकै हृदयविदारक मात्र होइन्, बाबा र छोरीको पहिलो तथा अन्तिम भेट थियो । कृष्ण भन्छन्,‘मैले अस्पताल लगेर श्रीमतीको सबै चेकजाँच गराएको थिएँ । दुई पटक भिडियो एक्स–रे पनि गराएँ । चिकित्सकले सबै राम्रो छ भन्नुभएको थियो । तर अन्तिममा यस्तो भयो ।’

एम्बुलेन्स सडकमा फस्नुभन्दा केही बेरअगाडि शिशु जन्मिएको थियो । त्यो बेलामा शिशु निकै रोएको बताइन्छ । त्यसपछि पानीफोका फुटेर शिशुको नाक र मुखमा परेपछि १० मीनेट पश्चात् उनको ज्यान गएको कृष्णको भनाइ छ ।

आँशु बगाउँदै उनले भने, ‘त्यहाँ कोही अनुभवी थिएनन् । बच्चाको श्वास गएको पाँच मीनेटपछि स्वास्थ्यकर्मी पुग्नुभयो । धेरै कोशिस गरे पनि बचाउन सकिएन । राम्रो बाटो र स्वास्थ्यकर्मी छिटो आइदिएको भए शायद बच्चालाई केही हुँदैनथ्यो होला ।’

उक्त घटना सम्झिँदै कृष्णले आक्रोश पोखेका छन् । चुनावमा भोट माग्दै आएका नेताहरुप्रति कृष्णले असन्तुष्टि जनाउँदै भने, ‘हिजो स्वास्थ्य हाम्रो प्राथमिकता भन्दै भाषण गरे । बाटो बनाइदिने प्रतिबद्धता पनि जनाए । हामीले पनि विश्वास गर्दै फूलमाला लगाइदियौं । त्यही फूलमाला लगाएको हातले नवजात शिशुको मृत शरीर च्याप्नुपर्दाको पीडाको बयान गरिसाध्य छैन ।’ कृष्णले अबका दिनमा पनि यस्ता घटना नघटोस् भनेर पटकपटक वडा र गाउँपालिकाको ध्यानाकर्षण गराउँदै आएका छन् ।