जनप्रतिनिधि मुकदर्शक भएको काभ्रेलीको आरोप

काभ्रेपलाञ्चोकको भुम्लु गाउँपालिकाले गत भदौ २४ गते सूचना प्रकाशित गर्दै ३५ दिनभित्र दोलालघाट क्षेत्र आसपासका अवैधानिक तवरले बनाइएका अस्थायी संरचना हटाउन निर्देशन दिएको थियो ।

नयाँ संरचना बनाउन गाउँपालिकाले अस्थायी संरचना हटाउन स्थानीय व्यवसायीलाई ताकेता गरेको हो । उक्त ताकेता पछि भुम्लुका जनप्रतिनिधिले पनि काठमाडौं महानगरपालिकाका मेयर बालेन्द्र साहले जस्तै काम गर्न लागेको भनेर स्थानीयहरु मख्ख परेका थिए ।

स्थानीयले कतिपय जनप्रतिनिधिलाई स्याबासीसमेत दिए । तर, हाल आएर स्थानीयको आशा निराशामा परिणत भएको छ । अवैधानिक संरचना हटाउन सूचना जारी गरेको ५० दिन बित्न लागिसक्दा पनि उक्त निर्णय कार्यान्वयनमा आएको छैन ।

पालिकाले अझैपनि त्यस्ता टहरा हटाउन नसकेपछि यतिखेर भुम्लुका स्थानीयले टिकाटिप्पणी गर्न थालेका छन् । गाउँपालिकाको पारा देखेर स्थानीय आक्रोशित देखिएका छन् । जनप्रतिनिधिमाथि स्थानीयले थुप्रै आरोपसमेत लगाएका छन् ।

आफू चर्चामा आउनैको लागि सूचना निकालेको स्थानीय वृद्धिध्वज भण्डारीको आरोप छ । उनी भन्छन्, ‘कामको लागि सूचना निकालेको होइन, आफू चर्चामा आउन नौटंकी देखाएका हुन् ।’त्यस्तै, चुनाव नजिकिँदै गर्दा जनता भाँडिन्छन् भन्ने डरले टहरा नहटाएको स्थानीय राम पहरीको भनाइ छ । ‘चुनाव लाग्यो, यो बेला टहरा हटाइदियो भने जनता भाँडिन्छन् भनेर काम अघि नबढाएको होला,’ उनले भने ।

जसले जे आरोप लगाए पनि जनप्रतिनिधिहरु भने मौन देखिन्छन् । गाउँपालिकाका कसैले पनि यस विषयमा बोल्न चाहेनन् । जनप्रतिनिधिहरु चुप लाग्दा स्थानीयले अनेक अड्कलबाजी लगाउन थालेका छन् ।