खुमलटारमा फेरि ओइरिन थाले माओवादी नेताहरु,तीन घण्टामा तीन जना

चुनावी परिणाम अन्तिम चरणमा पुग्दै गर्दा नेकपा माओवादी केन्द्रका अध्यक्ष पुष्कमल दाहालको निवास खुमलटारमा भेटवार्ताको लागि नेताहरु पुग्ने क्रम शुरु भएको छ । हिजोसम्म गोरखामा रहनुभएका दाहाल राजधानी फर्केपछि आजबाट राजनीति जोड घटाउको छलफल अघि बढाउनुभएको बताइन्छ ।

दाहाल निवास खुमलटारमा आज बिहान सबैभन्दा पहिले बाग्मती प्रदेशका युवा तथा खेलकुद मन्त्री रत्नप्रसाद ढकाल पुग्नुभयो । उहाँ सवा ७ बजेको समयमा त्यहाँ पुगेर अध्यक्षसँग ४५ मीनेट कुराकानी गरेपछि बाहिरिनुभयो ।

माओवादी स्रोतका अनुसार त्यसपछि दाहाल निवासमा शिक्षामन्त्री देवेन्द्र पौडेल पुग्नुभयो । पौडेल र अध्यक्षबीच सवा ८ बजेदेखि ४५ मीनेट एक्लै कुराकानी भएको बताइन्छ । 
 
दाहालसँग कुराकानी भइरहँदा उपाध्यक्ष नारायणकाजी श्रेष्ठ भेटवार्ताको लागि खुमलटार पुग्नुभएको छ । त्यसपछि अध्यक्ष पुष्पकमल दाहाल उपाध्यक्ष श्रेष्ठबीच सवा ९ बजेपछि छुट्टै भेटवार्ता भएको हो ।