एकीकृत समाजवादीको समानुपातिक मतप्रति एमाले अध्यक्षको आक्रोश

नेकपा एमालेका अध्यक्ष केपी शर्मा ओलीले समानुपातिक मतगणनामा प्रश्न उठाउँदै घुमाउरो शब्दमा एउटा पार्टीले पाएको मत अर्कोलाई गणना गरिएको गम्भीर आरोप लगाउनुभएको छ ।

उहाँले नाम नलिइकन सत्ता गठबन्धनमा रहेका पार्टीहरुमध्ये ‘केही पार्टी’ को मतवृद्धिलाई ‘अस्वाभाविक’ को बिल्ला भिराइदिनुभएको छ । आज सामाजिक सञ्जालमा लेख्दै अध्यक्ष ओलीले समानुपातिक मत परिणामप्रति अचम्मको आरोप लगाउनुभएको हो ।

‘सुरूदेखिको मतगणनालाई नियाल्दा पछिल्लो समयमा केही पार्टीको मत वृद्धि अस्वाभाविक देखिन्छ,’ साामाजिक सञ्जालमा लेखिएको छ, ‘एउटा पार्टीलाई आएको केही मत ३ प्रतिशत नकट्ने गठबन्धनमा रहेको अर्को पार्टीमा जोड्ने जस्ता गलत कार्य पनि हुनसक्छ ।’

ओलीले मतगणनास्थलमा रहेका कार्यकर्तालाई चनाखो हुन सुझाव दिनुभएको छ । उहाँले मत परिणामको मुचुल्काको प्रति आफ्नो फेसबुक बक्समा म्यासेज गर्नसमेत अनुरोध गर्नुभएको छ ।