दुई सिटे राप्रपामा सांसद बन्न मारमुंग्री,कार्यालय तोडफोड

संघीयता खारेजीको एजेण्डा लिएर चुनावमा गएको पूर्वपन्चहरुको पार्टी राप्रपामा प्रदेशको सांसद बन्न नेताहरुबीच हारालुछ हुँदा किचलो चर्किएको छ । चुनावमा सोचेभन्दा राम्रो नतिजा निकालेको राप्रपाले संघ तथा प्रदेशमा आफ्नो बलियो उपस्थिति जनाएको छ । तर, समानुपातिकतर्फ नेताहरुले आफ्नै मान्छेलाई राख्न खोजेपछि विवाद बढेको छ । 

प्रतिनिधिसभातर्फ पशुपतिसमशेर राणा र डा. प्रकाशचन्द्र लोहनीमध्ये समानुपातिकको बन्दसूचीमा १ नम्बरमा कसलाई राख्ने भन्ने विवादका कारण आन्तरिक चुनाव गरेको राप्रपाले अस्ति फाइनल नाम सिफारिस गर्दा बुध्दिमान तामाङलाई ल्याएपछि एउटा पक्ष असन्तुष्ट रहेको छ । यस्तो विवाद र असन्तुष्टी प्रदेशहरुमा झन धेरै देखिएको छ ।

समानुपातिकमा २ सांसद पाएको गण्डकीमा प्रदेश अध्यक्षले पैसा बुझाएर आफ्नो नाम सिफारिस गराएको आरोप छ । प्रदेशका अध्यक्ष पन्चराम गुरुङले पैसा बुझाएर सांसद बनेको भन्दै कार्यकर्ताले पार्टी कार्यालय तोडफोड समेत गरेका छन् । 

‘पैसा बुझाएर सांसद बन्न पाईंदैन,’ एक नेताले भने, ‘पार्टीमा दु:ख गरेका धेरै साथीहरु हुनुहुन्छ । अरुलाई अवसर दिनुपर्छ ।’ नेतृत्वको एकलौटी र निरङ्कुश कार्यशैलीविरुध्द कार्यकर्ताले पार्टीको प्रदेश कार्यालयमा तोडफोड र तालाबन्दी गरेको उनले बताए । 

राप्रपा मात्र होइन,नेकपा एमालेमा पनि समानुपातिक सांसद चयन प्रक्रियालाई लिएर गण्डकीमा असन्तुष्टि चुलिएको छ । समानुपातिकतर्फ १० सीट पाएको एमालेले २ जिल्लाबाट अधिकांश सांसद छनोट गरेपछि नेता-कार्यकर्ता असन्तुष्ट भएका हुन् । 

एमालेले कास्कीका ४ र बागलुङका ४ जनालाई छनोट गरेको छ । बाँकी २ जनामध्ये एकजना स्याङजा र अर्को एकजना लमजुङबाट समेटिएका छन् । ११ जिल्ला रहेको यहाँ एमालेले ४ जिल्लाबाट मात्रै सांसद छानेको हो । 

गोरखाबाट आदिवासी जनजाति क्लष्टरको दोश्रो नम्बरमा रहेका प्रेम गुरुङलाई हटाएर खस आर्यतर्फ २ नम्बरमा रहेका कास्कीका प्रकाश केसीलाई समावेश गरेको भन्दै एमालेकै नेता कार्यकर्ताले विरोध गरेका छन् । त्यसविरुध्द गोरखाका ११ वटै स्थानीय तहका अध्यक्ष र जनवर्गीय संगठनका अध्यक्षहरु केपी ओलीको निवास बालकोटमा डेलिगेसन गएका छन् ।