विनोद चौधरीलाई व्यापारीको प्रश्न ‘चीनमा १३ लाख,नेपालमा ३८ लाख किन ?’

डलर अर्बपति तथा नेपाली काँग्रेस सभासद विनोद चौधरीले आर्थिक मन्दीको बेला सवारी साधन बिक्रीमा पनि हात हालेका छन् । उनी आफू नेता बनेसँगै विद्युतीय सवारी साधन ‘नेता भी’ को पनि साहुजी बनेका हुन् । चौधरी ग्रुपले पछिल्लो समय चीनबाट विद्युतीय सवारी साधन नेपाल ल्याएर बिक्री गर्न थालेको छ ।

उनका भाइ अरुणले भारतीय मोटर कम्पनी मारुती सुजुकीको व्यापार गर्दै आएका छन् । दाइले भने विद्युतीय सवारी साधनमा हात हालेको छ महिना पूरा भएको छ । गत असारमा ‘नेता भी’ पहिलो पटक नेपाली बजारमा बिक्री गरिँदा चौधरीले त्यसको मूल्य ३७ लाख ९० हजार तोकेका थिए ।

तर चीनको बजारमा नेपाली मूल्यअनुसार १३ लाख पर्ने उक्त सवारी साधनलाई नेपालमा ल्याउँदा २५ लाख रुपैयाँ थप मूल्य पर्नुको कारणबारे धेरैले अचम्म मानेका छन् । सरकारले विद्युतीय सवारी साधन आयातमा न्यूनतम भन्सार शुल्क तोकेको छ । जसअनुसार कूल १८ प्रतिशत कर तिरे पुग्छ । 

नेपालको प्रचलित कानुनअनुसार सवारी साधनमा शुरुको मूल्यमा बढीमा १० प्रतिशत मात्रै नाफा जोड्न पाइन्छ । ग्वाङ्झौस्थित एक जना व्यापारीका अनुसार चीनबाट जतिसुकै महँगोमा सवारी साधन ल्याउँदा पनि भाडा १ लाख २० हजार रुपैयाँभन्दा बढी तिर्नु पर्दैन । 

यो हिसाबले नेपालको भन्सार बिन्दुमा आइपुग्दा चौधरीले बेच्ने गरेको ‘नेता भी’ गाडीको मूल्य १४ लाख २० हजारसम्म पर्न आउँछ । त्यसमा ५ प्रतिशत कर जोड्दा ७१ हजार र १३ प्रतिशतले हुन आउने भ्याट १ लाख ९३ हजार ८३० हुन्छ । त्यो सबै जोड्दा उक्त सवारी साधनको मूल्य भन्सारसम्म १६ लाख ८४ हजार ८३० हुन आउँछ । 

अब सोही मूल्यमा व्यापारीले बैंकको ब्याज ५० हजार पाँच सय, नाफा १० प्रतिशतले हुन आउने १ लाख ६८ हजार ४८३,विविध खर्च ५० हजारसहित कूल २० लाख तीन हजार १३ रुपैयाँमा बेच्नुपर्ने सवारी साधनलाई १८ लाख बढी लिएर ३८ लाखमा बेचिँदा सरकार रमाएकै देखिन्छ ।

विद्युतीय सवारी साधनले प्रदुुषण नगर्ने भएकाले शून्य प्रतिशत एमिशन भन्ने गरिएको छ । तर त्यही एमिशनको आवरणमा सतप्रतिशत कमिशन निकालिएकोतर्फ सम्बन्धित निकाय मौन हुँदा अन्य सवारी साधन बिक्रेताले जीब्रो काढेको पाइन्छ ।