छोराले गरे वृद्ध पिताको हत्या

संखुवासभामा पिताको हत्या गरेको आरोपमा प्रहरीले एक जनालाई पक्राउ गरेको छ । भोटखोला गाउँपालिका–५, लुङसुङ बस्ने २८ वर्षीय प्रेमकुमार राईलाई प्रहरीले आज बिहान पक्राउ गरेको छ ।

उनले आफ्ना ७३ वर्षीय बुबा गोठे राईको हत्या गरेको जिल्ला प्रहरी कार्यालय संखुवासभाले जनाएको छ । घरायसी विवादमा प्रेमकुमारले लाठी प्रहार गरेर बुबालाई गम्भीर घाइते बनाएका थिए ।

उपचारको निम्ति अस्पताल लैजाने क्रममा उनको आज बिहान बाटोमै मृत्यु भएको हो । प्रहरीले प्रेमलाई पक्रेर घटनाको अनुसन्धान अघि बढाएको बताइएको छ ।