जनकपुरमा ७० हजारमा पेस्तोल खरिद बिक्री, दुई जना पक्राउ
धनुषा प्रहरीले पेस्तोल बोकेर हिँडेका दुई युवकलाई पक्रेको छ । मिथिला नगरपालिका ६ का २८ वर्षीय रोशन महतो र सोही ठाउँका २६ वर्षीय शंकर महतोलाई प्रहरीले सार्वजनिक गरेको छ ।
दुबै महतो पेस्तोल बोकेर हिँडिरहेको सूचनाका आधारमा मिथिला नगरपालिका–२ नक्टाझिझको विश्वकर्मा चोकस्थित रोशनलाई चेकजाँच गर्दा माउजर पेस्तोल र पेस्तोलमा लोड गरिएको म्यागेजिन एक थान, म्यागेजिनमा लोड भएको केएफ दशमलव ६५ को दुई थान गोली बरामद भएको धनुषाका एसपी विश्वराज खड्काले जानकारी दिए ।
अस्ति पक्राउ परेका रोशनले दिएको बयानका आधारमा यसअघि पेस्तोल बिक्री गरेका शंकरलाई समेत पक्राउ गरिएको एसपी खड्काले बताए । रोशनले शंकरलाई ५० हजार नगद दिएको र पछि २० हजार रुपैयाँ दिने सहमतिमा पेस्तोल खरिद गरेको पनि प्रहरीको अनुसन्धानमा खुलेको छ ।
टिप्पणीहरू