क्लवको जग्गा व्यक्तिलाई सुटुक्क पास गराउने मालपोतका हाकिम भ्रष्टाचारमा तानिए

अख्तियार दुरुपयोग अनुसन्धान आयोगले भूमिसुधार तथा मालपोत कार्यालय पर्साका तत्कालिन कार्यालय प्रमुख कमोद तिवारीसहित ६ जनाविरुद्ध भ्रष्टाचार मुद्दा दर्ता गरेको छ । 

युवा स्पोर्टस क्लबको १ कट्ठा ५ धुर जग्गा व्यक्तिको नाममा गैरकानूनी रुपमा दर्ता गरेको आरोपमा तिवारीसँगै नायब सुब्बा शम्भु साह रौनियार र खरिदार शिवप्रसाद साह तेलीविरुद्ध अख्तियारले विशेष अदालतमा मुद्दा दायर गरेको हो ।

त्यस्तै, वीरगञ्ज महानगरपालिका–३१ का शेषसफि अहमद र शेखसाजिद एकबाल भ्रष्टाचारको मतियार बनेको भन्दै उनीहरुलाई पनि अख्तियारले मुद्दा चलाएको छ । शेषसफी अहमदले उक्त जग्गा आफ्नो नाममा लैजाने क्रममा गलत श्रेस्ता कायम गरेको पाइएको अख्तियारले जनाएको छ ।

उक्त जग्गा गैरकानूनी तरिकाले व्यक्तिको नाममा श्रेस्ता कायम गरेको भन्ने उजुरीको आधारमा अख्तियारले अनुसन्धान गर्दा भ्रष्टाचार गरेको पाइएकोले आरोपित ६ जनाविरुद्ध मुद्दा चलाइएको अख्तियारले जानकारी दिएको छ ।