वसन्त चौधरीले ‘भ्यालेन्टाइन डे’ लाई थप प्रेमिल बनाउने

यो वर्षको ‘भ्यालेन्टाइन डे’ को दिन प्रेमिल कवि तथा गीतकारका रुपमा चिनिएका वसन्त चौधरीको एकल कविता वाचन गरिने भएको छ ।

कवि चौधरीले आगामी फागुन २ गते राजधानीको मण्डला थिएटरमा गर्ने ‘कवितासँग वसन्त’ नामक एकल कविता वाचनको थिम ‘लभ इज इन दि एयर’ राखिएको छ । अपरान्ह पौने ४ बजेदेखि सुरु हुने उक्त कार्यक्रममा प्रेमसँग सम्बन्धित कविता सुनाइने छ । 

भ्यालेन्टाइन डेलाई विशेष बनाउन प्रेमका कविता तथा रचना प्रस्तुत गर्दै एकल कविता वाचन कार्यक्रम आयोजना गरिनु नेपाली साहित्यमै नौलो कार्य हो । सो कार्यक्रममा कवि चौधरीले एक दर्जन बढी प्रेमिल कविताहरु प्रस्तुत गर्ने बताइएको छ ।

त्यसदिन उनका दुईवटा पुस्तक ‘मेरा गीत’(गीतहरुको संग्रह) तथा ‘जीवनमन्त्र–२’ (सुक्ति संग्रह) समेत लोकार्पण गरिँदैछ । कार्यक्रममा सहभागिता जनाउन चाहनेले ९८१९१४०४९० मा सम्पर्क गरेर आफ्नो स्थान सुरक्षित गर्न आयोजकले जानकारी दिएको छ । 

वसन्त चौधरी नेपाली साहित्यमा प्रेमसँग सम्बन्धित कविता तथा रचनाका लागि स्थापित नाम हो । उनले केही वर्षअघि नेपाली साहित्यको उन्नतिका लागि विश्व काव्ययात्राको आयोजना गर्दै विभिन्न देशमा पुगेर प्रेमिल कविताहरु वाचन गरेका थिए ।

नेपाली भाषाका साथै हिन्दी भाषामा समेत कवि चौधरीका सशक्त सिर्जनाहरु सार्वजनिक भइसकेका छन् । केही समयअघि उनका ८५ वटा कविता संग्रह ‘तिमीबिनाको म’ सार्वजनिक भएको थियो । यसमा संग्रहित अधिकांश रचना प्रेमसँग सम्बन्धित छन् । 

त्यसअघि हिन्दी काव्य संग्रह ‘अनेक पल और मैं’ सार्वजनिक भएको थियो भने ‘मेघा’ देखि ‘तिमी बिनाको म’ सम्म उनका एक दर्जन कृतिहरु प्रकाशित भइसकेका छन् । चौधरीका अधिकांश कविता समकालीन मनुष्यका सुख दुःख, हास्य एवम् रोदन अर्थात प्रेमानूभूतिसँग सम्बन्धित छन् । उनले कवितामा प्रयोग गर्ने बिम्ब र प्रतीक अरुभन्दा पृथक पाइन्छ ।