दुई देशको पासपोर्ट बोकेर दिल्ली उड्न लागेका दुई जनाको झोलाभरी पाउण्ड

काठमाडौँबाट भारतको राजधानी नयाँ दिल्ली जान ठिक्क परेका एक नेपालीसहित दुई जना ठूलो मात्रामा अवैध रकमसहित विमानस्थलबाट समातिएका छन् । आज अपरान्ह भिस्तारा एअरको उडानबाट दिल्ली उड्न लागेका उनीहरु १७ हजार बेलायती पाउण्डसहित पक्राउ परेका हुन् ।

त्रिभुवन अन्तर्राष्ट्रिय विमानस्थलको प्रस्थान कक्षमा प्रहरीले उनीहरुको हाते झोला चेकजाँच गर्दा उक्त रकम भेटिएको हो । रामेछापका ३४ वर्षीय हितबहादुर खत्री र दुई देशको पासपोर्ट लिएका प्रविनसिंह बडूलाई प्रहरीले नियन्त्रणमा लिएको हो । 

प्रहरीका अनुसार बडूसँग ब्रिटिश र मौरिससको पासपोर्ट भेटिएको छ । दुबै जनालाई थप अनुसन्धान तथा आवश्यक कारवाहीका लागि विमानस्थल प्रहरीले महानगरीय प्रहरी वृत्त गौशालामा बुझाएको छ । उनीहरुलाई विदेशी विनिमय ऐनअन्तर्गत भोलि राष्ट्रिय अनुसन्धान विभागमा पुर्याएर मुद्दा चलाउने प्रहरीको तयारी छ । 

अवैधरुपमा लैजान खोजिएको उक्त रकम आजको विनिमय दरअनुसार झण्डै २८ लाख नेपाली रुपैयाँ हो ।