जर्मन टोलीद्वारा सिंहदरबारमा लगातार भेट, जर्मन राजदूतको छुट्टै कुराकानी

नेपाल भ्रमणमा आएको जर्मनीको संसदीय टोलीले आज सिंहदरबारमा एकपछि अर्को भेटघाट गरेका छन् । उनीहरुले सभामुख, उपप्रधानमन्त्रीलगायत चार जना मन्त्रीसँग लगातार भेट गरेको बताइन्छ । 

सिंहदरबारस्थित सभामुखको कार्यकक्षमा सभामुख देवराज घिमिरेसँग जर्मन राजदूत डा. थोमस प्रिन्जले शिष्टाचार भेटवार्ता गर्नुभएको छ । सभामुख घिमिरे र नेपालका लागि जर्मन राजदूतप्रिन्जबीच बिहानको समयमा एक घण्टा कुराकानी भएको हो ।

टोलीले परराष्ट मन्त्रालयमा परराष्ट्रमन्त्री डा. विमला राई पौडेलसँग भेट गरेको हो । टोली प्रमुख तथा जर्मन सांसद रेनेट कुनास्ट नेतृत्वको टोलीले मन्त्री पौडेलसँग दिउँसो १ बजेको समयमा भेटवार्ता गरेको हो । त्यस अवसरमा  नेपालका लागि जर्मनीका राजदूत डा. थोमर प्रिन्जको पनि उपस्थिति थियो । 

त्यसपछि टोलीले अर्थ मन्त्रालयमा उपप्रधान तथा अर्थमन्त्री विष्णुप्रसाद पौडेलसँग कुराकानी गरेको जानकारी दिइएको छ । त्यस अवसरमा पनि राजदूत प्रिन्जको उपस्थिति थियो ।  

अर्थ मन्त्रालयबाट निस्केपछि जर्मन संसदीय टोलीले कृषि तथा पशुपंछी विकास मन्त्रालयमा मन्त्री ज्वालाकुमारी साहसँग भेट गरेको हो । उक्त भेटमा पनि जर्मन राजदूतको उपस्थिति रहेको बताइन्छ । 

उता खानेपानी मन्त्रालयमा मन्त्री अब्दुल खाँन र नेपालका लागि फिनल्यान्डका राजदूत रिना रिक्का हेइकाबीच दिउँसो आधा घण्टा कुराकानी भएको थियो ।