नेपालीलाई कतार पुलिसमा भर्ना गराइदिने नाममा ६३ लाख ठगी

वैदेशिक रोजगारीमा कतार पठाइदिने नाममा ठगी गर्दै आएका एक व्यक्ति पक्राउ परेका छन् । आकर्षक तलबको प्रलोभनमा पारेर सर्वसाधारणलाई ठग्दै आएका पूर्णकुमार दाहाल ठगीको नयाँ विषयमा प्रहरी नियन्त्रणमा पुगेका छन् ।

नेपाल प्रहरीको काठमाडौँ उपत्यका अपराध अनुसन्धान कार्यालयबाट खटिएको टोलीले हिजो साँझ उनलाई झापाको भद्रपुरबाट नियन्त्रणमा लिएको बताइएको छ । 

सप्तरीको कञ्चनपुर गाउँपालिका ४ घर भई हाल काठमाडौँको टोखा बस्दै आएका ४१ वर्षीय पूर्णबहादुरले वैदेशिक रोजगारीमा कतार पठाइदिने र त्यहाँ पुगेपछि कतार पुलिसमा जागिर लगाइदिने प्रलोभनमा सर्वसाधारणलाई फसाएका थिए । 

कतार जान प्रतिव्यक्ति सात लाख रुपैयाँ लाग्ने र मासिक एक लाखभन्दा बढी तलब हुने प्रलोभनमा १८ जना पीडितबाट पटकपटक गरी ६३ लाख रुपैयाँ उठाएपछि उनी सम्पर्कविहीन भएका थिए ।

पीडितहरुले वैदेशिक रोजगार विभाग र विभागले प्रहरीलाई अनुरोध गरेपछि दाहाल हिजो पक्राउ परेका हुन् । उनलाई थप अनुसन्धान तथा कारबाहीको निम्ति विभाग पठाइएको प्रहरीले जनाएको छ ।