युवतीको सामाजिक सञ्जालबाट अश्लील भिडियो पठाएका रोल्पाका ओमप्रकाश पक्राउ

सामाजिक सञ्जालमार्फत् अश्लील भिडियो पठाएर हैरान पार्दै आएका एक जना पक्राउ परेका छन् । रोल्पाको सुनिलस्मृति गाउँपालिका–५ का २२ वर्षीय ओमप्रकाश महरालाई नेपाल प्रहरीको साइबर व्युरोले पक्राउ गरेको बताइएको छ ।

एउटी युवतीले हराएको मोबाइल भेटाएका महराले सोही मोबाइलमा रहेका युवतीका सामाजिक सञ्जालका विभिन्न एकाउन्टबाट युवतीकै आफन्तहरुलाई अश्लील भिडियो पठाएको आरोपमा उनलाई पक्राउ गरिएको ब्युरोले जनाएको छ ।

युवतीले मोबाइल हराएको केही दिनपछि आफ्ना सामाजिक सञ्जालका सबै खाताको नाम परिवर्तन गरेर अश्लील नाम राखिदिएको र ती एकाउन्टबाट आफ्नो सहोदर दाजुलाईसमेत अश्लील भिडियो पठाएको उजुरी साइबर बयुरोमा हालेकी हुन् ।

ब्युरोले सोही उजुरीका आधारमा अनुसन्धान गरी महरालाई पक्राउ गरेको जनाएको छ । उनलाई विद्युतीय कारोबार ऐन २०६३ अन्तर्गतको कसूरमा जिल्ला अदालत काठमाडौँबाट ७ दिन म्याद थप गरी अनुसन्धन भइरहेको जनाइएको छ ।