राष्ट्रपतिकाे आममाफीले छायाँमा परेको गणतन्त्र दिवस (फोटो फिचर)

टीकापुर नरसंहारमा दोषी ठहर भएपछि जन्मकैद सजाय भुक्तान गरिरहेका चौधरीलाई नेपाल सरकारको सिफारिसमा राष्ट्रपति रामचन्द्र पौडेलले गणतन्त्र दिवसको अवसरमा हिजो आममाफी दिएपछि चौतर्फी विरोध भएको छ । चौधरी सदरखोर डिल्लीबजारबाट आज बिहान बाजागाजासहित बाहिर निस्केका छन् । 

मन्त्री तथा पत्नी एवम् नागरिक उन्मुक्ति पार्टीकी अध्यक्ष रञ्जिता श्रेष्ठ चौधरीको गाडीमा बसेर सैनिक सुरक्षाकर्मीसहित झण्डा हल्लाउँदै उनी पुल्चोकस्थित मन्त्री क्वार्टर पुगे । बिहान सवा ११ बजेको उडानमा उनी नेपालगञ्ज हुँदै कैलाली गएका छन् ।

यता सरकारले काठमाडौंको टुँडिखेलमा १६औं गणतन्त्र दिवस मनाएको छ । सैनिक मञ्च टुँडिखेलमा आयोजित विशेष समारोहमा गणतन्त्र दिवस मनाइएको हो ।

कार्यक्रममा राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री पुष्पकमल दाहाल, प्रतिनिधिसभाका सभामुख देवराज घिमिरे, राष्ट्रियसभा अध्यक्ष गणेशप्रसाद तिमिल्सिना, कायममुकायम प्रधानन्यायाधीश हरिकृष्ण कार्कीलगायतको उपस्थिति थियो ।

कार्यक्रमका अवसरमा टुँडिखेलमा विभिन्न झाँकी प्रस्तुत गरिएको थियो । तर, चौधरीको १५ वर्ष बाँकी कैद मिनाहा गरिएको सन्दर्भमा सामाजिक सञ्जाल र सञ्चार माध्यममा सार्वजनिक भएका तस्बिर र समाचारले आजको गणतन्त्र दिवसलाई ओझेलमा पारेको हो ।