जर्साबहरुले पत्याउन थाले आफ्नै अस्पताललाई

नेपाली सेना तथा तिनका आश्रित परिवारको स्वास्थ्योपचारका लागि छाउनीमा स्थापित वीरेन्द्र सैनिक अस्पतालको सेवासुविधा छिटोछरितो भएपछि भीआईपीहरू उपचारका लागि त्यतै धाउन थालेका छन् । 

सन् १९९० मा बनेको उक्त अस्पतालले काठमाडौं महानगरपालिकासँग समन्वय गरेर बेलाबखत विभिन्न स्वास्थ्य सेवा सञ्चालन गर्दै आएको छ भने निःशुल्क डायलायसिस सेवा पनि उपलब्ध छ । ६३५ शय्याको अस्पताललाई ९०० शय्याको बनाउने प्रक्रिया अगाडि बढेको छ । अस्पतालमा हाल ३५० चिकित्सक कार्यरत छन् । पूर्वरथी बालानन्द शर्माकी श्रीमती हाल यही अस्पतालमा उपचाररत छिन् । न्यूरोको समस्या देखिएकी उनी शिथिल अवस्थामा रहेकाले आइसीयुमा उपचारमा भइरहेको छ । 

उनलाई मुलुककै उत्कृष्ट मानिएको मेडिसिटी अस्पतालबाट ल्याएर यहाँ भर्ना गरिएको हो । त्यस्तै, पूर्व प्रधानसेनापति रुक्माङद कटवालले पनि सैनिक अस्पतालमै हप्ताको दुई पटक डायलाइसिस गराउँदै आएका छन् । हाल स्वास्थ्य अवस्थामा निकै सुधार आएका उनी आफैं हिँडडुुल गर्नसक्ने भएका छन् । उपप्रधान एवं रक्षामन्त्री पूर्णबहादुर खड्काले हालै सोही अस्पतालमा प्रोस्टेटको शल्यक्रिया गराएका छन् । 

पूर्व प्रधानसेनापति प्यारजंग थापा, राजेन्द्र क्षेत्रीलगायत पनि उपचारका लागि सैनिक अस्पताल नै पुग्ने गरेका छन् । यस अस्पतालले बिहान ८ बजेदेखि नै ओपिडी सेवा सञ्चालनमा ल्याएको छ । सेवा लिन दिनभर लाइन लाग्नुपर्ने बाध्यता हटेको छ । आधा घण्टामै औषधि पाइन्छ । 

बिरामी कुरुवाका लागि अस्पतालले छुट्टै बसोबासको व्यवस्थापनसमेत मिलाएको छ । नियमित सरसफाइ गर्न थालिएकाले अस्पताल चिटिक्क परेको छ । पहिलेभन्दा अस्पताल धेरै राम्रो भएको एक सैनिकले बताए । 

सैनिक अस्पतालमा विगतको तुलनामा धेरै सुधार भए पनि सानातिना कमजोरीमा भने ध्यान पु¥याउन आवश्यक देखिन्छ । एक साताअघि एक जना गर्भवतीको ज्यान गयो । सिपाही तहमा कार्यरत उनको अत्यधिक रक्तश्रावका कारण मृत्यु भएको हो । मरेको बच्चालाई जन्म दिएकी उनको बेलैमा ध्यान पुर्‍याउन ​​​​​​नसक्दा प्राण गुम्यो ।