स्कर्पियोको ठक्करबाट मोटरसाइकल चालकको निधन, धर्मेन्द्र बास्तोला प्रहरी नियन्त्रणमा

क्रान्तिकारी कम्युनिष्ट पार्टीका प्रवक्ता धर्मेन्द्र बास्तोलाले चलाएको स्कार्पियोले ठक्कर दिँदा एक जना मोटरसाइकल चालकको ज्यान गएको छ । सुर्खेतको पञ्चपुरी नगरपालिका घर भएका ६२ वर्षीय बास्तोलाले चलाएको बा. ९ च ७१९८ नम्बरको स्कर्पियोले ठक्कर दिँदा २९ वर्षीय वसन्तराम चौधरीको मृत्यु भएको हो । 

हिजो राति ९ बजेर ४० मीनेटमा पूर्व–पश्चिम राजमार्गअन्तर्गत पर्ने दाङको राप्ती गाउँपालिका वडा नम्बर ५, सिङ्गेमा स्कर्पियोले विपरीत दिशाबाट आउँदै गरेको रा. ६ प ५६३८ नम्बरको मोटरसाइकललाई ठक्कर दिएको जिल्ला प्रहरी कार्यालय, दाङले जनाएको छ । 

स्कर्पियोको ठक्करले टाउकोमा गम्भीर चोट लागेका चौधरीलाई तत्काल स्वास्थ्य चौकी, सिसहनियाँ पुर्याइएको थियो । उनलाई हिजो राति नै चिकित्सकले मृत घोषित गरेको प्रहरी निरीक्षक सुशील थापामगरले बताए । 

बास्तोला इलाका प्रहरी कार्यालय, भालुवाङको नियन्त्रणमा छन् । ‘काठमाडौंबाट सुर्खेततर्फ जाँदै गरेको स्कर्पियोले ठक्कर दिँदा मोटरसाइकल चालकको ज्यान गएको छ । उहाँ अहिले प्रहरीको नियन्त्रणमा हुनुहुन्छ’, उनले भने ।